(Voice of Samoan People Inc Logan City)
Ua mae‘a nei le filifiliga tofi a le Mafutaga a le Leo o Tagata Samoa e pei ona faataunuuina i le afiafi o le Aso Sa, 24 o Fepuari 2013. Na paia ma mamalu lea faamoemoe auā sa auai le State Member of Parliament mai Woodride, tamaitai faipule ia Desley Scott faapea le susuga ia Rev Isamaeli Liaina na ia momoliina laau i Fogaa ma tāpā le Agaga Paia e auai ma faatasi i le fonotaga ae le gata i lea o le tele o isi faafeagaiga e auai ma lagolago le Mafutaga.
E pei ona masani ai fonotaga faapenei o le tolaulauina o ripoti faaletausaga. O le Mafutaga a le Leo o Tagata Samoa na faavaeina i le tausaga 2008 ina ua tulai mai le faafitauli lea na maliu ai se tama Apolosini, lea sa logologoā ona tala na aafia ai alo ma fanau Samoa.
O le Tofa ia Faimalotoa Ioane Pale na filifilia e avea ma Peresitene, ma o lea lava ua toe pale mai i le tofi i le taimi nei, ma ua tele naua le sao o lea tamalii i meafai a Samoa aemaise le tau vavaoina o faafitauli e tutupu ma aafia ai tupulaga Samoa ma isi atunuu.
Sa ia auai foi i le fonotele na auai (Summit) i le Aso Faraile 22/2/2013 lea na toe faailoa aloaia ai e le faipule mai le itumalo o Rankin ma o le Minisita foi lea o fefaatauiga ia Dr Graig Emerson, o mātua uma na malaga mai i le sitiseni a Niu Sila i le mae‘a ai o le tulafono lea na sainia i le va o Niu Sila ma Ausetalia i le 2001, o alo na fananau i lea taimi ma ua atoa le ta‘i 10 tausaga, o le a mafai ona maua e nei tamaiti le sitiseni Ausetalia na o le $60.00 e apalai ai pe afai e lē o sitiseni Ausetalia o latou mātua.
E lē o nofoai mafutaga Samoa i Brisbane i le taumafai e talosaga ni fesoasoani i le malo o Ausetalia ona o nai tagata malaga mai isi atunuu aemaise lava Niu Sila pe a fuafua atu i le faigata ua iai nei aso. O loo tapena mamao pea ma e faamoemoe i le Atua e faafaigofie nei vaega uma.
O le filifiliga tofi a le mafutaga na manino mea uma leai se faanenefu auā na fofola le lipoti a le failautusi faapea le lipoti a le Peresetene. Na faaailoa ai le toe faafouina o le faavae (constitution). O le Liability Insurance sa $10 miliona ae o lea ua sii atu i le $20 miliona i le tausaga nei ona ua faatuputupulaia pea le mamalu o le atunuu i totonu o le Mafutaga.
O le soifua maloloina o le fautuaina lea o tagata Pasefika e faamalosia le taumafaina o meaai paleni ma meaai e faaitiitia ai le faaaogāina o le ga‘o, toe faamalosia asiasiga i le falepuipui atoa ai ma le polokalame na amataina i le 2012 o le Fue Felafoai lea o loo faafoeina e le tofa ia Leautuli‘ilagi Sogialofa Malaeoalii Vaa Leapai.
Na toe faamalosia tupulaga ina ia auai atu i taaloga a le mafutaga e faatumu ai o latou taimi ma faaitiitia ai le auai i nofoaga faitele ma aafia ai i soligatulafono mamafa. E momoli foi le faafetai tele i le Afioga i le Peresetene Faimalotoa Ioane Pale ona o le mataala i ona tiute aemaise le logologo pea o alaleo auā le silafia e le atunuu o vaega o tutupu o loo gapatia ai, ma o loo vaavaalua ma le tofa ia Leautuli‘ilagi S.M. Vaa Leapai i lea matagaluega.
Ua faamavae le failautusi ma le teutupe o le 2012 ona o nisi o tuatuagia, Faamatuainu Vaaaoao Alofipo ma le afioga ia Lemalu Faitoaga.
Suigatofi a le Leo o Tagata Samoa
2013-2015 (24/2/2013)
Peresetene: Faimalotoa Ioane Pale
Sui Peresetene: Masoe Falemoe
Failautusi: Ranandy Stanley
Sui Failautusi: Val Fainuu
Sooupu & Teuoloa: Leautuliilagi Malaeoalii Sogialofa Vaa Leapai
Taitai Autalavou & Taaloga: Robert Savelio
