Ua filifilia se tasi o tamaitai loia Samoa o Katalaina Maka Sapolu e avea ma faufautua sili o mataupu tau tulafono poo se chief legal counsel poo le principal legal adviser mo le ofisa o atunuu Aferika, Kerepeane ma le Pasefika le ACP Group, lea e 79 atunuu o loo iai.
O tiute o le tamaitai loia o le a aofia ai ma lona silasila i auala faaletulafono o loo fausia ai nisi o maliega e pei o le Georgetown Agreement na fausia ai le maliega e faavae se faalapotopotoga o atunuu Aferika Kerepeane ma le Pasefika, faapea le maliega ua ta‘ua o le Cotonou Agreement o loo maua ai le sootaga vavalalata o atunuu ma le iuni a malo Europa le European Union.
O le tofiga ua umia e lea tamaitai loia o le atunuu ua faaauau ai pea lana tautua i le galuega faaloia ma tulafono faavaomalo e pei ona sa galue ai i se tofiga faapea mo le ofisa o malo o le Taupulega o loo i Lonetona i Peretania.
Sa avea o ia ma Peresitene o le sosaiete a loia i Samoa mai le tausaga e 1997 i le 2001 ma sa galue foi i Samoa e pei ona sa faafoe ai sona ofisa loia, ae o le tausaga e 2002 na malaga ai ma lona aiga i Europa ma faamautu ai e oo mai i le taimi nei.
Saunoa le tamaitai loia, o se avanoa sili ona faafetai ai ina ua ia maua lenei tofiga e galue ai mo lenei faalapotopotoga.
O le ACP o se faalapotopotoga e taulai ana galuega i le tapenaina o vaega tetele mai atunuu tauatia‘e (developing countries) ina ia iai so latou leo i mataupu o loo lotea ma talanoaina i atina‘e faavaomalo e ono aafia ai i latou.
