Filifilia se tama aoga i le Manu Samoa 7s

Tuna Tuitama

E lē o se taimi muamua lenei ua filifilia ai i se aulakapi faavaomalo a le atunuu, le Manu Samoa se tama aoga i totonu o le autaitoafitu a le Manu Samoa. 

O le susuga ia Brian Lima na uluai filifilia foi i le Manu Samoa a’o aoga i le kolisi o Sagato Iosefo. O le taimi lenei ua filifilia ai i le ‘au a le Manu Samoa Sevens se tasi o alii talavou mai i le Kolisi Maualuga o Leulumoega Fou, le susuga ia Tuna Tuitama e 19 tausaga le matua mai le afioaga o Mulifanua ma Faleasiu.

O se tasi lenei o tama taalo na maitauina mai lava i taaloga a Kolisi Maualuluga i totonu o le atunuu, e lē gata o taaloga lakapi taitoafitu ae faapea foi taaloga o le 15. Ma na iai lava le manatu maualuga o le tatou nusipepa mai le tele o tausaga ua alu, e iai lava se taimi e filifilia ai le susuga ia Tuna Tuitama i le autaitoafitu a le Manu Samoa.

O le Aso Toonai na tea nei na malaga atu ai i Niu Sila le autaitoafitu a le Manu Samoa mo le faamoemoe e faia ai se latou taaloga ma le autaitoafitu a Niu Sila e tapena ai le ‘au a le Manu Samoa Sevens mo le taamilosaga o le Oceania lea e tau faamautu ai sona avanoa i taaloga a le Olimipeka e faia ai i Tokyo Iapani i le tausaga fou. 

O le miti lenei mo le susuga ia Tuna Tuitama e pei ona ia ta’ua ai na amata taalo mai lava i le taaloga lenei o le lakapi a’o aoga ai i le tulagalua i Mulifanua, sosoo mai ai ma le Kolisi o Leulumoega Fou e pei ona filifilia ai o ia i ‘au a tama aoga i lalo o le 18 tausaga le matutua, seia oo mai lava i le taimi lenei ua filifilia ai o ia i totonu o le Manu Samoa Sevens. O le naunautaiga o lenei alii talavou ina ia to’aga pea e koleni ma tumau lona malosi ina ia mafai ona faaauau ai ona taalo mo sona avanoa i le autaitoafitu a le Manu Samoa. O le susuga ia Tuna Tuitama na avea ai foi ma se tasi o sui saoasaoa mo le auafeleti a le Kolisi Maualuga o Leulumoega Fou mai taaloga Afeleti a kolisi maualuluga i lenei tausaga.

O se tasi foi lenei o tama taalo na mataina lana taalo mai le ‘au a le Aana Chiefs i taaloga o le Senior A mai le taamilosaga o le Super 9 o lenei tausaga, lea foi na ia maua ai se sikoa mo le ‘au a le Aana Chiefs i le sailiga siamupini ma le ‘au a le Vaimauga Eels. O le ‘au a le Manu Samoa ua malaga atu ai nei i Niu Sila e lē gata ina filifilia ai le susuga ia Tuna Tuitama ae faapea foi nisi o sui talavou saoasaoa e pei o le susuga ia Kelvin Masoe ma Pesamino Iakopo. I le ‘au atoa a le Manu Samoa ua koleni ai nei i totonu o Niu Sila.

Alamanda Motuga, Belgium Tuatagaloa, David Afamasaga, Elisapeta Alofipo, Joe Perez, Johnny Vaili, Kelvin Masoe, Kirisimasi Eteuati Savaiinaea, La’aloi Leilua, Melani Matavao, Paulo Scanlan, Paulo Toilolo Fanuasa, Pesamino Iakopo, Philip Luki, Sione Young Yen, Tila Mealoi, Tofatuimoana Solia, Tipaula Sapeti, Tomasi Alosio Logotuli, Tuna Tuitama, Va’afauese Apelu Maliko, ma Uaina Sione.

O le masina fou ua faamoemoe e tausinio ai le Manu Samoa i le taamilosaga o le Oceania e faia ai i totonu o laufanua o Fiti.