O le a tauaaoina e le Tupu Tamaitai o Peretania, Queen Elizabeth II, se faailoga faapitoa i le tamaitai ia Petronilla Molioo Mataeliga, i se sauniga o le a faia lea i le Buckingham Palace i Lonetona i le Aso Lua 26 o Iuni. O lenei faailoga taualoa ua faaigoaina o le Queens Young Leader’s Award, o se faailoga e amanaia ai galuega ma tautua a talavou o atunuu uma o loo i totonu o le lio o Malo o le Taupulega a Peretania (Commonwealth).
E faavae lenei faaeaea ona o galuega lelei o loo faia e talavou, o loo atinae ma suia ai olaga o tagata lautele. O le tuuina atu o lenei Faailoga Faapitoa ia Petronilla, ua maua ai foi ma lona avanoa e auai i le Polokalame faapitoa a le Tupu Tamaitai le Young Leaders Programme. E silia i le afe talavou mai atunuu o le Taupulega a Peretania sa talosagaina avanoa i lalo o le polokalame lenei ua faamanuiaina ai Petronilla.
O le tamaitai o Petronilla, o se alo e faasino i le afioga ia Fonoti Pio Molioo ma le faletua ia Mulipola Analosa Molioo. O le tautua a Petronilla o le toe lalagaina o le gaosia o meataulima Samoa, e masani ona gaosia e tina e pei o fala lauie ma fala teuteu e pei ona vaaia i le ata. E tusa ma le 240 talavou ua tuuina atu iai lenei faailoga faapitoa mai atunuu e 53 o le Taupulega a Peretania, i lalo o le polokalame lenei o le Young Leaders Programme. O Petronilla ua 26 tausaga o lona soifua, na ia faaalia lona fiafia tele e malaga atu i Peretania e talia lona Faailoga Faapitoa mai le Tupu Tamaitai. “O se faaaloalo maualuga mo a’u lo’u feiloai atu i lana Maiesetete le Tupu Tamaitai o Peretania, o se isi lenei vaega taua o le tala faasolopito o lo’u olaga.”
Na ia faaalia foi lona fiafia e feiloai atu i isi foi talavou ua filifilia i le Young Leaders Programme. “Ua ou sauni e feiloai atu i isi talavou ua filifilia i le polokalame, aua o matou uma o loo tutusa le sini o loo matou finau iai, o le atinaeina lea o le soifua lelei o tagata lautele, ou te mautinoa o le a tele foi ni lesona aoga ou te aoaoina mai ia latou.”
O le polokalame e faagasolo i le tausaga atoa mo talavou uma e tauaaoina iai lenei Faailoga Faapitoa, o le a auai i latou uma i ni polokalame tau aoaoga faaptioa i le Iunivesite o Cambridge, o le a auai foi i ni fonotaga ma aoaoga faapitoa e tapue ai o latou tomai faaletaitai, o le a maua foi avanoa e fesootai ma fetufaai ai ma pisinisi faapea faalapotopotoga eseese i totonu o Peretania i le faamoemoe e atili tapue ai le silafia ma le atamai.
A’o iai Petronilla i Peretania, o le a asiasi atu i nisi o nofoaga e pei o le BBC World Service faapea le Ofisa autu o le Facebook. O le a maua foi le avanoa e feiloai atu ai i le Failautusi Aoao o le Commonwealth, faapea Hai Komesina mai atunuu uma o le Taupulega a Peretania. O le a faapea foi ona asia nisi o poloketi i totonu o Peretania, o loo fesoasoani mo tagata lima vaivai.
O lenei polokalame faapitoa, Young Leaders Programme na faavaeina i le 2014, o loo galulue faatasi ai le Queen Elizabeth Diamond Jubilee Trust, o le Iunivesite o Cambridge, o le Comic Relief ma le Royal Commonwealth Society.
Na ta’ua e Dr Astrid Bonfield CBE, o le Ofisa Sili o le The Queen Elizabeth Diamond Jubilee Trust e faapea, o le polokalame lenei Young Leaders Award, o se avanoa lelei mo taitai o le lumanai, e aoaoina ai ni lesona lelei mo i latou ina ia avea ai i latou ma taitai lelei ma ia mafai foi ausia o latou faamoemoega i le lumanai.
Na ia faaalia foi lona fiafia tele e faafeiloai talavou e 240 mai atunuu uma o le Commonwealth ua faamanuiaina, e aofia ai ma le tamaitai Samoa o Petronilla Molioo Mataeliga.
