Ua filifilia e le faalapotopotoga o le Toomaga mo Tagata Puapuagatia, le alii taalo lakapi o le au taitoafitu a le Manu Samoa o Paul Perez, e fai ma a latou Amepasa e taulamua ia latou polokalame, e tetee atu i soo se sauāga i totonu o aiga poo Domestic Violence.
Ua ave i ai le lagolago a le faiaoga, le pulega ma le au lakapi taitoafitu atoa a le Manu Samoa i lea faamoemoe tāua.
E pei ona faaalia e le faiaoga le susuga Stephen Betham, o se polokalame e tāua tele e pei ona sa savavali foi le au taitoafitu a le atunuu i se faamoemoe a le Toomaga i le tausaga na tea nei, sa faalauiloa ai le tetee atu i soo se sauāga e aafia ai fanau ma tamaitai.
E tele kalapu lakapi i fafo sa mananao mai i le alii o Paul Perez ae na faaalia e le faiaoga o Stephen Betham, ua lē talia e lea alo o le atunuu ia ofo, ona ua fia nofo i le au lakapi taitoafitu a le atunuu mo lenei tausaga.
Ua tautino lea tama lakapi o ia sa aafia i le faatinoina o sauāga i totonu o aiga i tausaga ua mavae, ma o le mafuaaga lea o le naunau e lotolotoi i tala‘iga a le Toomaga mo Tagata Puapuagatia e taofia ai sauāga faapea, ona ua ia silafia e leai se tāua i le soifuaga saogalemu o se tagata i se aiga.
E leai se isi e atoatoa e pei ona faaalia e Paul Perez, ae e aogā faaletonu e toe fuataina ai le olaga ma taulai le vaai i se mea sili atu ona lelei e foia ma togafiti ai se faaletonu.
O le alii o Paul Perez na amata mai ona taalo lakapi i Niu Sila, mo le kalapu lakapi a Taranaki mai le 2006 e oo i le 2009, ma sa avea ai foi o ia o le tagata na pito sili ona tele ana sikoa (leading try-scorer) mo lena kalapu i le tausaga e 2008. Peitai na aafia Perez i ni moliaga sa faamaonia o le faaoolima, ma toe faafoi ai i Samoa i le tausaga e 2010.
