Filifilia Logo Silao Lemana, avea ma failautusi Ao o le Malo

O se tasi o tamalii o le atunuu ua loa tausaga o aumau ma alaala i Niu Sila, le tofa Logo Silao Lemana mai le afioaga o Leulumoega ua filifilia nei e avea ma failautusi faapitoa a le Ao Mamalu o le Malo e sui tulaga i le afioga Fuimaono Titimaea Tafua, ua toe foi e faaauau lana tautua i le Iuni lakapi a le atunuu. Ua maea ona faamaonia e le Kapeneta le filifilia o Logo i le tofiga failautusi mo le Ao o le Malo ma o le vaiaso na tea nei na faia ai ni faaaloaloga maualuluga a le aiga o le failautusi filifilia mo le Ao Mamalu ma lana masiofo, faapea le Malo e faafetaia ai le tuuina atu o le faatuatuaga ia te ia na te tauave ai lea tofiga taua.
O le masina o Mati o le tausaga ua mavae na toe taliu mai ai i Samoa le tofa Logo Silao seia oo ina filifilia e avea ma sui o le atunuu i le Komisi suesue sa silasila i le aumaia faanana o fana mai Amerika Samoa i luga o le vaaleoleo o le Nafanua. I se pepa o faamatalaga ua faaalia ai, e tele nisi tofiga sa umia e lea tamalii aemaise o galuega sa tautua ma auauna ai mo le atunuu a o lei siitia atu ma aumau i Niu Sila.
O Niu Sila nei sa matele ina aumau ai lenei tamalii ua 82 nei tausaga o lona soifua.Na galue muamua i le Matagaluega o Felauaiga i le malae vaalele faavaomalo i Faleolo ma o se matai foi i le afioaga o Leulumoega. Maua foi i sailiga a le Samoa Times faapea e toa 10 nai ona alo ae na muai aotauina mai o itiiti i le aoga a Malisi i Lotopa.O se tasi o tamalii ua loa foi le tautua i le atunuu aemaise ae na soifua mai i le tausaga 1937 i le aso 19 o Fepuari.