Sa a’oa’oina le afioga Leota Raymond Schuster, ma maua ona faailoga loia i le Iunivesite a le Pasefika i Fiti, ae o le Kolisi o Sagato Iosefo i Lotopa a’o iai le kolisi i lea nofoaga a’o lei siitia i Alafua e pei ona iai i le taimi nei na a’oa’oina ai le alii loia.
O se alo e faasino i le afioga Saunoamaalii Sonny Schuster sa avea ma Komesina o Leoleo i le tele o tausaga ua mavae.
O lona tina o le faletua o Theresa Schuster. O lona uso matua o le tofa Lefau Harry Schuster sa avea ma loia ma avea foi ma Faamasino ae na faamavae ina ua tauva i se tasi o palota tele a le atunuu ma filifilia ai e avea ma faipule mo nofoa e lua o le itumalo o le Vaimauga i Sisifo i se tasi o paeaiga a le Palemene ua mavae.
O le vaiaso ua mavae na filifilia ai Leota e le komisi o galuega a le faamasinoga e taitaifono ai le Faamasino Sili le afioga Patu Falefatu Sapolu e avea ma Faamasino o le Faamasinoga Faaitumalo a Samoa. O se tamalii sa galue i le ofisa o le Loia Sili a le Malo sosoo ai ma le galue i se ofisa loia tuma’oti seia oo ina faia sona ofisa loia faatasi ai ma nisi o loia.
Faaalia e le Pule Sili o le Matagaluega o Faamasinoga le susuga Papalii John Taimalelagi Afele, o le aso 7 o le masina fou o Setema e faatauto ai Leota a’o lei see atu e galue o se faamasino. E toatolu faamasino o lea faamasinoga i le taimi nei e aofia ai tamaitai faamasino e toalua.
O i latou ia o le afioga Fepuleai Ameperosa Roma, ma tamaitai faamasino le afioga Alalatoa Rosella Viane Papalii, ma le tamaitai faamasino le afioga Talasa Atoa Sa’aga.
O le a toafā ai nei faamasino o le Faamasinoga Faaitumalo i le afioga Leota Raymond Schuster.
O tausaga e tele ua mavae sa toaitiiti tama fanau a Samoa sa avea ma faamasino o le faamasinoga o soligatulafono ae sa toatele i faamasino mai fafo.
O faamasino sili foi sa tele ina filifilia mai Niu Sila ae o le vaai i le siitia o lea tomai ma tofia iai alo ma fanau a le atunuu o se isi lea laasaga maualuga ua ausia e galuega a le faamasinoga i Samoa.
Ua faailoa mai foi e le Pule Sili o le matagaluega o faamasinoga se isi faaiuga a le komisi o galuega a le faamasinoga, o le filifilia lea o se tasi o faamasino o le faamasinoga o fanua ma suafa e avea ma faamasino o le faamasinoga fesoasoani.
O le tofa Masinalupe Tusipa Masinalupe ua galulue nei faatasi ma isi faamasino o lea faamasinoga e tauaveina moliaga solitulafono e fofoga ma suesueina e le faamasinoga fesoasoani.
