Na tauaofia le fono faaletausaga a le asosi o tusitala ma tagata faasalalau a Samoa ma faatino ana iugafono, ae na tolopo le sailiga o sui o se laulau fou poo se komiti faafoe, ina ua faigata ona faamanino pe faapefea ona faia palota a sui lesitala o le asosi e filifilia ai sui o le laulau.
Na toe tauaofia le fonotaga mo le filifiliga o se komiti faafoe ae sa faigata ona faamanino poo ai sui e tatau ona palota. O le mau a le laulau sa seei i tofiga mo le silia i le ono tausaga ua mavae, e na o sui lesitala na totogi lesitala talu mai le fono faaletausaga mulimuli na faia i le tausaga e 2011.
Peitai sa finau atu le toatele o sui fou ma sui tuai, e faaaogā le faautautaga mamao a le komiti faafoe e tatala ai le palota i sui lesitala fou ma sui tuai ona ua toatele ua avea ma sui o le asosi.
O le afiafi o le Aso Tofi ua mavae atu nei na faatino ai le sailiga tofi i le faletalimalo o le Mellenia i Sogi, lea sa faatumulia i sui tusitala ma tagata inisinia ma pueata mai nusipepa, o leitio ma fale televise i le atunuu.
O se fono muamua foi lea ua vaaia ai le lolofi atu o tagata o loo tautua ma galulue i galuega faatusitala ma faasalalau faapea le au inisinia e fia auai ona o lea ua iai le Tulafono e faatū ai loa se fono faatonu o galuega faapenei poo se Media Council. Sa auai le afioga Galumalemana Faiesea Matafeo o le pule o le TV1 i Mulinuu, o le faletua o Verona Parker o loo pulea le fale televise o le TV3 ma le tofa Tuuu Taulima Tofaeono, o loo pulea le TV a le ekalesia Katoliko o le Upu Mana.
E oo lava foi i le alii pule o le WT Media le susuga Rudy Bartley, ma nisi o tusitala sinia sa latou soalaupule le mataupu, ma tafa ai le finagalo malosi o le laulau sa iai e tatala loa le palota e sailia ai se komiti faafoe fou.
O le tuuaulafo o le laulau sa seei i tofi na faia ai loa le filifiliga lea ua tulai mai ai le afioga Faumuina poo le tofa Apulu Lance Polu i le tofi Peresetene, ae sui Peresetene le susuga Rudy Bartley. O le faletua le afioga Tofilau Merita Huch ua avea ma Failautusi, ae o le Teutupe o le faletua o Verona Parker.
Ua iai ma sui ua lagolago i nei tofiga e pei o Asenati Taugasolo Semu mai le ofisa o le Press Secretariat a le Malo, ma le tamaitai tusitala sinia o Pa‘i Mulitalo o le nusipepa o le Samoa Observer. O le tofa Tuuu Taulima Tofaeono o le isi lea sui fou o le komiti faafoe.
O sui o le komiti faafoe tuai e leai se isi na toe filifilia e aofia ai le teutupe le faletua o Angie Kronfeld Polu, o Lagi Keresoma sa sui peresetene, ma Leilua Ame Sene sa avea ma failautusi. O le susuga Uale Papalii ua tuumalo sa avea ma Peresetene.
