Filifilia le Miss Cook Islands i le Top 12 a le Miss World 2019

Le tamaitai ia Tajiya pito itu taumatau sa avea ma Miss Oceania i lea po

O le tamaitai o Tajiya Sahay o le Miss Cook Islands, sa tauva mo le pale o le Miss World 2019, na mau tulaga ina ua filifilia i le to’a 12 pito i luga poo le Top 12. O se tulaga maualuga lena i nei foi tauvaga, auā e silia ma le 100 tamaitai lalelei mai atunuu eseese o le lalolagi na tauva ai. Na filifilia ai foi le Miss Cook Islands mo le pale o le Miss World Oceania i lena tauvaga.
O tala faapenei e tāua tele i le talafaasolopito a atunuu o le Pasefika, mai nei tauvaga tetele a le lalolagi, auā e lē masani ai pe seāseā ona mau tulaga ai se tamaitai tauva mai se atunuu o le Vasa Pasefika. Mo le Atu Kuki lava latou, o se uluai taimi lea mo se latou tamaitai tauva ua ausia ai lenei tulaga maualuga.


Na maualuga taumafaiga a le Miss Cook Islands i tauvaga o taaloga faapea i taleni, lea sa faatino ai lana siva faa-Atu Kuki o se vaaiga na matuā iloga ona maofa ai le lalolagi sa maimoaina le tauvaga.
Faaalia le matuā faafiafiaina o le komiti tapena a le Miss Cook Islands i le maualuga na oo i ai taumafaiga a le latou tamaitai tauvā, ua momoli mai ai foi se feau faalototele i nisi tamaitai o le Atu Kuki faapea le Pasefika atoa, e mafai telē ona mau tulaga tamaitai Pasefika i nei tauvaga tetele a le lalolagi.
O le Miss Jamaica: Toni-Ann Singh ua manumalo nei i le pale o le Miss World 2019, tulua atu i ai le Miss India: Suman Rao. O lenei tauvaga sa faia i ExCel London i Lonetona i Peretania i le aso 14 Tesema 2019. O Tajiya Sahay, e 26 ona tausaga ma o ona tupuaga, o lona tamā o se tagatānuu o Fiti ma lona tinā o se Rarotonga, ae na fanau ma tausia a’e le tamaitai o Tajiya i Brisbane i Ausetalia.
Peitai sa mafai ona tele se malamalamaga o le tamaitai talavou i ona tupuaga Pasefika, ona e lē gata sa tele taimi e malaga ai e asiasi i le atunuu o lona tina i Rarotonga ma faamasani ai i le aganuu ma tu masani a tagata Pasefika, ae sa tele foi taimi e auai lenei tamaitai i meafai faa-Pasefika, ma le tele o tala sa faamatala i ai e lona tina, i lona tupuaga faa-Pasefika aemaise tu ma agaifanua a le Atu Kuki.