Galuega mo le Manuia Lautele Tauaveina e Leuluaialii Olinda Woodroffe
E lē faigofie ona tofia ma maua se tulaga maualuga mo le toe iloiloina ma le toe tusia o tulafono, ma se isi alafua mo le agai i luma o se faalapotopotoga tele i le lalolagi. E seāseā lava foi ona maua ma soona tofia i ai se isi mo lea ituaiga tofiga, aemaise lava foi o lenei itulagi o loo tatou aumau ai.
Ae ui lava i lea, ua faamanuiaina le tamaitai loia Samoa, le afioga ia Leuluaialii Olinda Woodroffe, ina ia iai i le komiti tofia mo le toe fesuiaiga ma le toe tusia o tulafono e limataitaiina ai le ekalesia LMS, Perepereane i le lalolagi atoa, e aofia ai ma le Pasefika.
O le afioga ia Leuluaialii Olinda, sa avea ma sui o le Pasefika i totonu o le Komiti Faafoe mo tausaga ua tuanai, peitai ua toe faamanuiaina i se tasi o tofiga tāua tele, la lea e pei ona ta‘ua.
O se feiloaiga i le vaiaso talu ai, na ta‘ua ai e le tamaitai loia, e tele ma anoanoai ana galuega o loo feagai ai i lenei vaitaimi, aemaise ai foi o ia o se tina, o loo nafa foi ma tiute faatina i totonu o le aiga. Peitai o le agaga lava fia tautua ma auauna mo le Atua ma lona finagalo, aemaise ai o loo silasila toto‘a mo se manuia mo tagata Pasefika, ma le agai i luma o le ekalesia aoao, ua manatu ai o le a lē taofia pe teena foi le filifilia o lona tagata mo le manaoga ua tuuina mai.
O le tofiga ua tofia ai le loia Samoa, sa tuusa‘o mai lava i Lonetona i le nofoaga autū o le ekaleisa, ma o Olinda o se tasi o sui e toaono ua filifilia mo lea komiti faapitoa a le lalolagi atoa, e tauavea le galuega e pei ona faailoa mai.
Sa ta‘ua e Leuluaialii, o se tausaga ese lenei mo ia, ona o le faigata tele i le laitiiti o lona taimi, ae fai lava si tele o tiute tauave ua agai mai, ae pei lava ona ia faailoa muamua, e lē taofia ai le faatinoina o ona tiute tauave e pei ona tautua ai i le ekalesia.
O le Aso Faraile, aso 16 o le masina nei, ua sauni le loia e malaga atu ai i Hong Kong, mo le faataunuuina o le fonotaga e pei ona atofaina aemaise ai o le faataunuuina o le tiute ma le tofiga e pei ona tuuina mai. O le fonotaga sa faia i le amataga o le tausaga nei i Aferika i Saute, ma Lonetona, sa faaataata ane ai lea tofiga fou mo Leuluaialii, ma agai ane ai lava ina faamautuina ma taliaina foi e le loia. O nisi o nei fonotaga sa faataunuuina i telefoni ma fesootaiga faaonapo nei (teleconference).
O le igoa LMS sa toe suia i le tausaga e 1977, ma faaigoaina ai o le CWM, poo le Council of World Mission. O le tausaga e 2009, sa faia ai se fonotaga tele i Initia a le lalolagi atoa, o ekalesia sa faavae mai le LMS, Lotu Taiti e pei ona iloa ai. O le tausaga foi lea sa tofia ai Leuluaialii e avea ma trustee o le Presbyterian Church of Aotearoa i Niu Sila.
O le fonotaga la lea ua sauni atu a le Council of World Mission i Hong Kong, ua iai le faamoemoe o le tamaitai loia, o le a tāua tele ona o le a tuufaatasi ai ma le isi toalima e pei ona filifilia mai i isi atunuu, ma soalaupule ai nisi o aiaiga ma vaega uma o le a tuufaatasia mo le lumanai o le ekalesia aoao i le lalolagi.
Na saunoa foi Olinda o le CWM, o se faalapotopotoga e tele tupe, ma e tamaoaiga tele foi, e tele ni mea totino sa onaia e le CWM i totonu o Hong Kong, ma o le toe faatauina atu o ia aseta ma mea totino, sa mafua ai ona faatamaoaigaina lenei lava vaega.
O vaega tupe tetele uma a le faalapotopotoga, o loo faapea ona umia ma faasoasoa mai e lona ofisa tutotonu o loo i Lonetona, auā lava le atinaeina o lotu i le lalolagi atoa faapea ai ma le Vasa Pasefika, e aofia ai ma Niu Sila.
Na faailoa foi e Leuluaialii, e fai lava si tetele o vaega tupe o loo faamatuu mai e le nofoaga tutotonu o le lotu, peitai o loo pogisa pea i ai le silasila ma le tagai a le toatele o ekalesia i lenei itulagi, ma o le isi foi lea itu tāua o lona iai i lea komiti, o le a manino ai ma malamalama tagata Pasefika i le mau seleni o loo tuuina mai ae lē o silafia e le toatele poo fea o loo agai i ai.
O loo fesiligia foi e le loia le tulaga o loo faaaogāina ai tupe a le faalapotopotoga o loo tuuina mai mo le atina‘e o lotu taitasi. Na ta‘utino foi Olinda, ua ia iloa ma faapupula ona mata e le Atua, ma ia iloa ai le leai o se faiga amiotonu (transparency). E fai si ofo o le tamaitai loia i le tele o tupe o loo sasaa mai i le Perepereane a Niu Sila, ae lē o faalauaiteleina lona faaaogāina.
E lua ni faalapotopotoga o loo tautua ai Leuluaialii. O loo ona tauaveina tiute i luga o le Council a le YWCA (Young Women’s Christian Association) i Aukilani. O le tausaga nei, o loo faailoga ai le 125 tausaga talu ona faavae le YWCA i Aukilani. O le YWCA o se faalapotopotoga i le lalolagi.
O le YWCA a Aukilani e fesoasoani mo teine mai a‘oga eseese i Aukilani, e vaivai aiga i mea tau tupe ma faataitaiga, ina ia oo a‘oga a nei teine laiti ua filifilia e aooga i le Iunivesite ma fai latou ma taiala mo nisi teine laiti. O le tele o teine o loo manuia i nei taumafaiga o alo a mātua Pasefika.
O loo iai sui o Samoa, Amerika Samoa ma isi atunuu o le Pasefika. O loo iai foi sui o le isi Ekalesia Pasefika mai i Niu Sila i totonu o le CWM, ae na o Leuluaialii Olinda le sui atu i lenei vaega o le lalolagi sa valaauina i le komiti e toa 6, lea e aiaia policies ma fesuia‘i vaega e tatau ona sui, e fai ai galuega a le CWM i le isi 10 tausaga lea o le a sau.
Sa ta‘ua e Leuluaialii lona naunau ia iai ni tulafono (policies) a le CWM i isi tausaga e 10, ia faalauaitele i tagata lotu ia ni tino i tupe o loo aumai mo galuega atina‘e a Ekalesia, ae aua le maua mai, uumau e isi, ae lē faalauaiteleina mo le silafia ma fai ai ni polokalame e manuia lautele ai tagata lotu.
O loo iai le faamoemoe e toe faaauau atu se lipoti i galuega a nei faalapotopotoga i se taimi o i luma pe a taliu mai Leuluaialii mai Hong Kong.
