O pulega a alii ma faipule o soo se alalafa ma afioaga i Samoa, e mamalu ma maopoopo ai le va tapuia aemaise o le va nonofo o aiga ma soifua taitasi, e puipuia foi measina ma puna‘oa faapelepele a afioaga, aemaise o le tuu taliga atu pea i lea augatupulaga, ma lea augatupulaga.
E ui lava la ina ua motu mai ma le taula sailigamalo a le paia ma le mamalu o alala ma papaaao i Niu Sila faapea foi Ausetalia, ae o loo faaauau pea ona sisi o latou faamalama ma tautua pea e tusa ma faasinomaga na ta‘ita‘i aaoina ai soifua ma ola, e talitonu o le tasi lea o mafuaaga o loo faatauina ai i tafa e fia o nei atunuu ese, le faamaopoopoina o fono a tupu ma e‘e o le atunuu, auā lava le fia tautua faatasi e atinae se lelei mo Samoa.
O le Fono Faufautua mo tagata Samoa i Vitoria, na faavae mai le tausaga e 1990. E ui ona ua eseese vaitau ma ona taitaiga, ese foi ma tulafono fai, ae tasi lava le auga ma le autū o le Fono, o le tautuaina lea o le mamalu ma le paia o Samoa o loo alala ma nopia‘i i Melepone ma le setete o Vitoria, e pei ona silafia, ua tatou iai i si‘ui o lenei tausaga, ma o le vaitaimi e tele ina fai ai suigatofi o faalapotopotoga eseese ma ekalesia.
O le afiafi o le Aso Toonai na mavae atu na faataunuuina ai le faamoemoe lea o le Fono Faufautua, ma o le sui o la tatou auaunaga a le Samoa Times na faatautaia le suigatofi a le Fono mamalu o loo tautua ai alii ma faipule, tupu ma e‘e, le aufaigaluega paia a le Atua, tuaa sinasina, aemaise o le mamlu o Samoa atoa.
Na faataunuuina le palota, manumalo ma tulai mai ai le afioga ia Lemalu Faatau ua fai nei ma taitaifono mo le tausaga 2013/2014. O le fetalaiga ia Sa‘u Osovale Brown ua avea ma sui taitaifono, o le afioga ia Aufaamulia Anthony Sofe ua avea ma aao tusitusi o le Fono, a o le teuoloa ua nafa nei ma le tamaitai ia Karolyna Salanoa.
Na mae‘a filifilia le laulau, ona faapaia lea ma faamanuia e le auauna totofi a le Atua, a o tapuai Samoa na potopoto, momoli ai le saunoaga faafetai a le taitaifono e tusa ma le faamoemoe, sosoo ai ma le malu afiafi ma tatala ai le filialii. Tau ina ia maua so tou finagalo mai le Atua, e tautua ai Samoa. O outou māmā na!
