Ua toe filifilia nei se tasi o alii sa avea ma faiaoga o le au lakapi liki o le Toa Samoa e toe alu ane e faaauau le galuega sa ia faia, a o lei faamavae ona o se isi galuega faapea i se kalapu lakapi liki i Ausetalia.
O le alii o Steve Price sa faiaoga i le ‘au a le St George Ilawara ae o le sailia o se faiaoga mo le Toa Samoa na faaalia e le pulega o le lakapi a le atunuu, na pau lea o le sui na talosaga e ausia le tulaga manaomia mo le tofiga, ma o le mafuaaga foi lea ua toe filifilia ai.
O le a nafa ma Steve tapenaga a le Toa Samoa mo le taaloga faitaulia ma le ‘au malosi a Tonga i le masina nei, ma o Penrith i Ausetalia o le a faia ai lea taaloga. O le a sosoo ai ma tapenaga a le ‘au a le atunuu mo le Ipu o le lalolagi i le tausaga nei.
O le lua ai lenei o tausaga o avea Steve Price ma faiaoga o le ‘au a le Dragons i Ausetalia ae o le a motusia ona o lea ua toe tusi aao i ai le pulega o le Toa Samoa. O nisi o tamafanau a le atunuu o loo taaalo i le lakapi liki i kalapu i Ausetalia e pei o Roy Asotasi ma Steve Matai o le a agai i ai se filifiliga mo le ofi i le Toa Samoa auā taaloga o loo loma nei.
