Filifilia le Au Fusu a Samoa mo Taaloga a le Youth Olumpics

Malcolm Preston Mathnes ua fai ma sui o Samoa i taaloga a le Youth Olympic Games
Malcolm Preston Mathnes ua fai ma sui o Samoa i taaloga a le Youth Olympic Games

 

Ua maea nei taaloga o fusuaga e pei ona talimalo ai Samoa ile faaiuga o le masina na te’a nei o Me ma le aso muamua o Iuni lea ua filifilia ai le au fusu a Samoa e fai ma ave fu’a a le atunuu mo taaloga a le Youth Olympics e faia i Buenos Aires i Argentina ile aso 6 aga’i ile aso 18 o Oketopa o le tausaga nei lava. O le alii talavou ia Malcom Preston Matthes ua fai ma sui o Samoa i ia taaloga ina ua qualify mai i taaloga na faia i Samoa, ae o le alii o Marion Ah Tong ua maua foi lona avanoa i nei taaloga e pei ona agavaa mai ai ile vaega o le UP (Universal Place).

E ese mai i taaloga o le Youth Olympics lea e faia i Argentina le isi foi tauvaga tele e faia ai i Budapest Hungary mai le aso 20 – 31 o Aokuso o le tausaga nei lava lea foi ua filifilia ai Malcom Preston Matthes ma le susuga ia Jancen Papalii Poutoa.

I se feiloaiga a le tatou nsuipepa ma le failautusi a le faalapotopotoga o fusuaga a le atunuu le susuga ia Faletolu Su’a na ia taua ai, ose taunuuga lelei lea o le gapatia ai o le asosi o fusuaga e ala i le atina’eina o alo ma fanau ae le gata i lea o avanoa na ausia ina ia mafai ona faia mai ai iinei ia taaloga e pei ona faamanuiaina ai tatou alo ma fanau i nei avanoa le aumaua.

Saunoa foi Su’a, o loo talia foi faaiuga a le AIBA e ala i suega e pei ona alofaiava iai tatou Faiaoga ma faatonu, o laufali ma faamasino aemaise o ITOS. O se faamanuiaga lea mo le aga’i i luma o fusuaga a si o tatou atunuu e faafetaia ai le afioga i le persetene ia Papalii Pasi Poloa ma le komiti e ui i le tele o lu’itau ma faafitauli sa tula’i mai ae sa gafataulimaina lava fuafuaga uma lea ua a’e ma le manumalo ai faiva o le tatou Asosi aemaise fusuaga a Samoa e ala i nei faamanuiaga.

O sui o Samoa ua fililia mo taaloga a le World Champ  Budapest Hungary
O sui o Samoa ua fililia mo taaloga a le World Champ Budapest Hungary

E pei ona silafia e fetaui tonu le talimalo ai o Samoa i fusuaga talu ai nei ae faailoa mai le faaiuga o le faamasinoga o taaloga mo fusuaga a le atunuu lea ua manino mai ai le faaleaogaina uma ai o le pulega a le fusuaga a Samoa, e le’o manino mai la ile taimi lenei po’o fea o le a aga’i iai le pulega o iai nei e tusa ai ma lea faaiuga e pei ona amata mai ile taimi na tuuina atu ai e se tasi o sui tuai o le Olo Peleki ma le Manu Samoa le susuga ia Fesola’i Vaaiga Tuigamala le mataupu lenei ile kapeneta a Samoa ona e faapea e solitulafono le aveeseina o ia mai le tofiga Peresetene o fusuaga a le atunuu, lea na faatonuina ai loa e le kapeneta le tuuina atu o le mataupu ile faamasinoga o taaloga a le Atunuu le Sports Tribunal.

E iai le malamalamaga o le tatou nusipepa mai ile talimalo ai o Samoa i fusuaga talu ai nei, e le’i toatele nisi o le atunuu na mafai ona aga’i atu e lagolago lea faamoemoe, ma a fua foi ile fuainumera o i latou na tausinio mai i isi atunuu e fai si to’alaiti o le fuainumera o tama fusu a Samoa ua saofaga atu ai nei mo taaloga a le Youth Olympics lea e na’o le toatasi sei vaga ai le isi avanoa o maua mai ile vaega ua faaigoaina o le UP poo le avanoa lea e okometi lava mo se tama taalo.

O se tasi lenei o taaloga e tele ina afea i saunoga a le taitai o le atunuu le Afioga ile Alii Palemia ona o le tele o faafitauli na tula’i mai ai aemaise lava i ana pulega. E moni ua faalauiloa mai sui o Samoa o le a fai ma ave fu’a o le atunuu i nei taaloga faavaomalo peitai e le’i faamautu mai poo ai i latou o le a malaga e fai ma pulega o le au fusu a Samoa i nei tausinioga tetele e lua.

O le a tulituliloa e le tatou nusipepa poo fea o fai iai le faaiuga a le Sports Tribunal ile tatau lea ona soloia le pulega o fusuaga o iai nei.