O le alii o Joseph Fruean Baice Parker, ua sauni atu nei e fai ma sui o Niu Sila i le taaloga o faipelega poo fusuaga, i taaloga o le Taupulega (Commonwealth Games) ua fuafua e faia i Initia ia Oketopa o le tausaga nei.
O le aupaga o le super heavyweight lea o loo taalo ai, ma o le aupaga foi lea ua sauni atu i ai mo taaloga ua fuafuaina.
O Joseph o se alii Samoa, ae sa lē iloa tele ma silafia e le toatele lona taumafai mai le uluai taimi sa amata mai ai ona faitauina o se tagata o loo iai se faamoemoe mo lea foi taaloga, seia oo mai i le taimi nei.
E manaia tele se faamatalaga e uiga i le amataina mai o le taleni a lenei alii ma lona faamatalaina, peitai e iai se taimi o le a toe auiliili atu ai mo le silafia e le mamalu o le atunuu.
Ae a o loma ai ma lupe le faamoemoe mo taaloga tele a malo o le taupulega, peitai ua sauni atu nei Joseph mo sana taaloga e saili tupe ai, mo lona faamoemoe i le masina o Oketopa o le tausaga nei lava.
O le vaiaso fou aso, aso 12 o Iuni, ua fuafua ai se fusuaga a le alo o le atunuu, o le a fetaui ai ma se alii Tonga mo le sailia o se seleni e fesoasoani ai mo i laua uma, mo le malaga atu i Initia.
O le alii Tonga o Junior Fa, o ia lea o loo fai sui o Tonga i taaloga a le taupulega, a o Joseph ua filifilia e fai ma sui o Niu Sila.
O le faamoemoe e pei ona fuafuaina, o le a faataunuuina lea i le ABA Stadium i Aukilani i le vaiaso fou e pei ona faamaonia mai e le tina o le alii taalo o Joseph.
O se faamatalaga sa tuuina mai i le tatou nusipepa, sa ta‘ua ai le leai o se fesoasoani a Niu Sila mo lenei alo o Samoa, peitai o le taumafai malosi lava a lona aiga, faatasi ai ma le alii papalagi sa ia muai iloaina agavaa o Joseph, sa fai lea ma auala o le alia‘e o le taleni, ma ua iloa ai nei e asosi o faipelega a Niu Sila.
O le tamā o le alii o Joseph le isi tagata sa matuā palasi i ai le mamafa o manaoga faatino i le tulaga tau seleni, mo le tau atinaeina o le taumafai a le atalii.
O le filifilia o le alii o Joseph mo le tauavea o le fu‘a a Niu Sila i taaloga a malo o taupulega, ua fai ma luitau i le toatele o nisi o loo iai i lea foi faagatama.
O le taliu mai o le alii fusu mai nisi o ana malaga faapitoa i atunuu i fafo, mo le taaloga lava o le faipele, sa maua ai lona avanoa e faalauiloa atili ai lona taumafai i luga o le polokalame a le televise tasi i ni nai vaiaso ua tuanai.
O loo iai le manaoga o le tina ma le aiga, aemaise ai foi o le pulega o loo vaaia taaloga a le alii taalo, ina ia lagolago atu le mamalu o le atunuu i le faamoemoe o Joseph, i le vaiaso fou e pei ona fuafuaina i Aukilani.
E pei ona muai lipotia, o le tupe o le a maua i lea taaloga, o le a vaelua tutusa ai Junior Fa mai le malo o Tonga, ma Joseph Fruean Baice Parker, e fesoasoani ai mo le sauni atu i taaloga o le a faia i Initia.
O Joseph o lona tamā o Dempsey Lalogafau Scout Parker, mai afioaga o Motootua, Tapatapao, Saanapu ma Solosolo, a o lona tina o Sala Baice Fruean Parker, e mai afioaga o Faleula, Lotopa, Satitoa i Aleipata, le afioga ia Leota ma Seupule.
O le alii pule poo lē o loo vaaia le tulaga o taaloga a Joseph, o le tuagane lava o lona tina, le susuga ia Rudy Laulunofovaleane Baice Fruean.
