Ua mae‘a ona filifilia Komesina Lagolago e to‘afa o le Matagaluega o Leoleo ma Falepuipui lea na faalauiloa e le faauluuluga o le matagaluega i le amataga o lenei vaiaso, faatasi ai ma le tofiga o le Faatonu o le vaega o tupe ma isi galuega tau i le matagaluega o leoleo ma falepuipui le director of corporate and strategic services lea ua toe filifilia i ai le susuga Lautimuia Afoa Uelese Vaai.
O Komesina Lagolago e to‘afa ua filifilia i ai nisi o leoleo ua ausia le tulaga faaleoleo o le superetene.
O le afioga Leaupepe Lealaitagomoa Fatu Pula ua faauluulu i ai le vaega o leoleo e ta‘ua o le General Policing poo le GP. O le susuga Leiataua Fata Aviga Salale, ua faauluulu i ai le vaega o soligatulafono.
O le afioga Sala Seaga Uili Lafaele ua iai le vaaiga o le vaega o galuega faapitoa a leoleo ma le puipuiga.
Ma le tofa Pagamalie Penani Lemuelu, ua faauluulu i ai le vaega o falepuipui e aofia ai ma le nofoaga o loo toe fuataina ai olaga o fanau talavou ua aafia i soligatulafono o loo i Olomanu.
I se pepa faalauiloa mai le ofisa o le komesina o leoleo ma falepuipui i vaega eseese o le matagaluega, o loo ta‘ua ai o le fonotaga a le kapeneta i le aso 10 o le masina o Fepuari na faamaonia ai ia tofiga fou.
Ua ave le tuualalo a le faauluuluga o le matagaluega i alii ma tamaitai o le malu o le Malo ina ia tuuina atu le latou lagolago atoa i Komesina Lagolago o leoleo ua filifilia i le faatinoga o o latou tiute mo le tautuaina o le Malo ma le atunuu.
O le filifilia o Komesina lagogao fou o le Matagaluega o Leoleo ma Falepuipui ua manino mai ai, ua suia uma nei le laulau o komesina lagolago o leoleo ini alii ofisa sinia sa umia nisi o tofiga ma vaaia nisi o vaega o le matagaluega.
O le tasi o Komesina lagolago sa faamalolo le tumau a o faatali se faaiuga o ona moliaga faasolitulafono e mafua i le tagi a se tamaitai leoleo, le susuga Motootua Tiatia na mae‘a lana konekarate i le masina na tea nei o Fepuari.
Na faamaonia mai lea tulaga e se ofisa sinia o le matagaluega o leoleo ma falepuipui.
O loo faatali pea se faaiuga a le faamasinoga i le faamaonia ma le lē faamaonia o moliaga o loo tuuaia ai lea tamalii sa avea ma Komesina Lagolago o le Matagaluega o Leoleo ma Falepuipui.
