Filifilia faifeau e lagolago tofiga faatamā o le Tautua Samoa

E leai se tuaoi o mea lelei, o le lagona laualuga lea o soo se tagata Samoa pe a oo ina talimalo, sii alofa i se faalavelave, poo le saili malo i se taaloga, ma soo se tausinioga e pei o upufai o Malo poo polokiki.

O le lagona lea i le mātau atu i le fulisia o le vaega faaupufai o le Tautua Samoa e filifilia nisi o faafeagaiga o le atunuu e avea ma faatamā o le latou pati e lagolago i le faatamā na muamua filifilia i le faatuina o le vaega faaupufai le afioga i le Papa Le Tagaloa Pitapola.

O le susuga i le faifeau o Apelu Lelevaga o le EFKS ua malolo penisione, a o le afioga Leaupepe o se faafeagaiga o le ekalesia Katoliko o le taitaifono foi lea o iai nei o le Fono a Ekalesia Soofaatasi.

Ua filifilia uma i le fono faaletausaga a le Tautua Samoa na usuia i le Aso Toonai na tea nei e avea ma faatamā ma sa talosaga Leaupepe e fia tautua ae tele ona tuatuagia faaleekalesia, peitai na ia talia lava le tuualalo a le taitai le afioga Palusalue Faapo II, e leai se mea e atugalu ai i lea itu ona e lē se mea e fono faalausosoo le vaega, ae se‘i vaganā foi ua manaomia ae o loo iai le afioga Le Tagaloa Pita e fai ma o latou sui.

O lona uiga ua toatolu ai faatamā o le pati faaupufai ina ua filifilia ia faifeau e lagolago i le afioga Le Tagaloa Pitapola o se tasi o sui faavae o le vaega ae o se tamalii sa tele foi tausaga o lotolotoi i upufai o le Malo i le tofi faipule o lona itumalo o Palauli le Falefa.

O le fonotaga a lea vaega o upufai o Malo sa filifilia ai nisi o tofiga o lana komiti faafoe, lea ua toe filifilia ai le afioga Salā Iose i le tulaga o le Pelesetene. O le tofa Talo Lavea Dr Ken Lameta o le teutupe fou, ma le failautusi ua see atu i ai le susuga Paul Salele sa umia le tofiga teutupe.

E 27 sui o le komiti faafoe ua tofia i ai nisi o tamalii ma failauga o le atunuu o i latou sa auai i le fono faaletausaga. O se fonotaga na folasia ai foi le tala o le tupe, lea na manino le aofia e gaogao ii lava ni seleni o tua i ai le pati i ana galuegafai, ma o se luitau lea i le tulai mai o le komiti faafoe fou, i le sailia o ni seleni auā ana galuega aemaise o le tapena atu i le palota tele a le atunuu i le tausaga e 2016.

E lei tumutumu le fonotaga e pei ona sa manatu e oo i se tulaga faapea ona sa faasalalau i auala o fesootaiga i Televise, leitio ma nusipepa.

Peitai e iai le talitonuga o nisi sui o le Tautua Samoa masalo, o le tele o tuatuagia ma le malaga i fafo o le toatele o sui lesitala o le vaega faaupufai.
O susuga i faafeagaiga i le laina i luma, o le taitaifono o le Fono a Ekalesia Soofaatasi le afioga Leaupepe Kasiano Leaupepe, ma le susuga i le faifeau malolo penisione, Apelu Lelevaga i le itu agavale, faapea le afioga Le Tagaloa Leota Pitapola (itu taumatau), o le faatamā na muai filifilia o le Tautua Samoa