Ua faalauiloa aloaia mai nei le lisi o tama fusu faapolofesa a Samoa o le a auai i fusuaga faavaomalo o loma nei lea, e aofia ai le aufusu e toafitu o le a tauva i le vae muamua o le taamilosaga o fusuaga faapolofesa a le Pasefika, le Pacific Rim Boxing Championship e faia i le ASB Stadium i Aukilani i le aso 21 Aperila.
O le aufusu a Samoa ua filifilia e aofia ai Warren Fuiava o Fa‘ala Palauli ma Lalomalava o loo avea ma siamupini o Samoa i le aupaga ‘light heavyweight’, o ia foi o le a avea ma paga faapitoa o le fusuaga tele i Aukilani.
E toalua ua filifilia i le aupaga mamafa, o Opetaia Mika Tui o Fa‘ala ma Asau faapea Gogosina Ulutoa o Samatau ma Salamumu. I le aupaga ‘cruiserweight’ ua filifilia Saipeti Muga Asiata o Vaiusu ma Safotu. I le aupaga ‘super middleweight’ ua filifilia Iosia Nanai o Falelatai ma Savaia i Lefaga. I le aupaga ‘welterweight’ ua filifilia Michael Fonoti o Falealili ma Manunu, a o Tony Iapesa o Alamagoto ua filifilia i le aupaga ‘light welterweight’.
Faaalia e le tofa Tuilagi Saipele Esera o le pulega o le Event Polynesia i Samoa le tāua o lenei avanoa mo le atina‘eina o fusuaga a Samoa, “O le iai o Samoa i le Pacific Rim Boxing Championship o le a lē gata ina mafai ai ona auai tama fusu a Samoa i fusuaga faavaomalo, ae o le a mafai ai foi ona maimoa Samoa i tama fusu a isi atumotu pe a oo ina talimalo Samoa ia Tesema o tausaga taitasi.”
O le vae lona lua o le taamilosaga o le a talimalo ai Fiti ia Iulai, ona sosoo ai lea ma Tahiti ia Oketopa.
O alii fusu faaleoleo mo le vae muamua i Aukilani ae sauni mo le taamilosaga i Fiti ua filifilia i ai Sipaia Fouvale o Lalovaea i le aupaga mamafa; o Luma Aifaalua o Lefagaoalii ma Foaluga faapea Alapati Kitiona o Paia ma Saleaumua ua filifilia i le aupaga ‘cruiserweight’, o Ualesi Ionatana o Safune ma Asau ua filifilia i le aupaga ‘light heavyweight’ a o Too Mita‘i o Faleasiu ma Safa‘i ua filifilia i le aupaga ‘super middlweight’. Faaalia e Tuilagi, “Ua mae‘a ona faataoto le ono masina muamua o le kalena o fusuaga faapolofesa o lenei tausaga lea na amata ia Fepuari i le fusuaga a Oli Filimaua i Niu Sila. O le taimi nei ua see atu tapenaga a Satiamalii Vaitele Soi i Niu Sila e faamae‘a ai mo lana fusuaga i le Aso Faraile 23 Mati lea o le a faia i le ABA Stadium i Aukilani.”
O le fusuaga tele i le Aso Toanai, 12 Me i Aukilani o loo fuafua e auai Pele Faumui o Fa‘ala Palauli ma Lalomalava o loo avea ma siamupini o Samoa i le aupaga o le ‘middleweight’ faapea Francis Mamoe o Vaiusu ma Toamua i le aupaga ‘cruiserweight’.
Faafetaia e le pulega a le Event Polynesia le lagolago malosi a le JP Fitness i Vaimea o loo mafai ai ona faatino toleniga a tama fusu mo le sauni ia latou fusuaga.
O loo faafetaia foi le fesoasoani tele a le faletaavale o le Motor 1 Samoa ma le faletalimalo i Fugalei o le Hennie’s Motel o lagolago malosi o fusuaga faapolofesa i Samoa i tausaga taitasi.
