Ua filifilia e le Malo o Samoa e ala mai i le Minisita o Aoga taaloga ma aganuu le afioga Magele Mauiliu Magele le afioga Aiolupotea John Roache o le Peresitene o le Kalapu lakapi a Aukilani Samoa mo le vaega o le autaalo ua matutua le Golden Oldies e avea ma sooupu mo le atinae o taaloga a Samoa i Niu Sila poo se coordinator.
Na faailoa aloaia lea faaiuga e le minisita o aoga ma taaloga ma aganuu i le afiafi o le Aso Faraile na tea nei i se taumafataga o le afiafi sa talimalo ai le aumalaga e to‘a 30 a le Aukilani Samoa lea ua sola ma le ipu o le siamupini o le taamilosaga Golden Oldies i le lakapi iuni sa faia i le taimi tonu o le Tutoatasi.
O le saunoaga a le Minisita na ia faailoa ai le tāua tele o le galuega o le a faia e Aiolupotea i le naunautaiga o le Malo e saga unaia pea le atinae o taaloga mo alo ma fanau o le atunuu. O le masina o Aukuso o le tausaga nei e masii ai le aulakapi o le Mauiti poo le vaega laiti mai Samoa mo se taamilosaga i Niu Sila.
Na faaalia e le Minisita o se taamilosaga tāaua aua o le a saga atinae ai pea le naunau o fanau e taaalo i le lakapi ma tulimatai so latou tulaga lelei i le taaloga i le lumanai. O le afioga Aiolupotea John Roache o se tasi o tamalii sa filifilia foi e le Malo i ni tausaga ua mavae e fai ma sooupu mo le tatou Manu Samoa.
O ia o se tasi o loo taulamua i le atinae o le lakapi i Aukilani lea foi o loo avea ma peresitene i le iuni lakapi a Aukilani Samoa. O le faatasiga na faalauiloa ai e le minisita le avea o lea tamalii ma sooupu mo taaloga a Samoa i Niu Sila na faasilasila ai foi e le minisita ma aso o taaloga e 4 a le Manuiti i Niu Sila.
O le aso 15 o Aukuso le taaloga muamua, sosoo ai ma taaloga e faia i le aso 18 ma le 21 o le masina lava lea, ae taualuga i le taaloga faitaulia poo se test i le aso 25 o Aukuso. O le Manuiti o se aulakapi fili ua iai i totonu fanau e i lalo o le 12 tausaga le matutua. O i latou ia o loo unaia malosi i le taaloga aua e faamoemoe i ai le lumanai o aulakapi a le atunuu aemaise lava i le Manu Samoa. O le talosaga a le minisita e manaomia e le manuiti le lagolago a le atunuu.
O le taualuga o le faatasiga i le Aso Faraile na tea nei o le foai atu lea e le au Golden Oldies a Aukilani o lana togiga na malaga ma i latou mo le kalapu lakapi Golden Oldies a Samoa.
