O lenei lava vaitau o le soifuaga ua tatou i ai, ua taua lava le silasila toto‘a ma filifili tatau mo le lumanai.
Oloo anoanoai avanoa lelei oloo saunia i lenei atunuu e faigofie ai ona tatou maua ni avanoa lelei mo le agai i luma, e le gata i tagata taitoatasi, ae mo le aiga atoa.
Ua taua lava le toe faaleleia o le tomai ina ia maua ni galuega lelei. Aua a lelei le galuega, ua lelei foi le totogi, ma ua soifua fiafia foi le aiga atoa, e oo lava i le aiga potopoto.
O le a faigofie ona faia tonu ma faataunuu, aua e gafatia e tagata uma.
Ua avea le tele o mau polokalame eseese oloo ofoina, ua le filifili tatau ai poo le a tonu lava le polokalame e talafeagai ma manaoga, tomai, poo le mafaufau.
Peitai, ua avea le naunau mai o auaunaga eseese ina ia toatele ni a latou tagata e faigofie ai ona maua tupe, ma ala ua tele ai faatosina, ua avaga gofie ai o tatou lagona, ae ua leai ai ma se‘i mafaufau, poo talafeagai ea lenei polokalame ma ou faamoemoega?
O le pogai foi lea o le toatele o nai fanau ua uma mai aoga maualuluga ua le faamanuiaina suega o le NCEA, ua na o le uma mai o lea polokalame, oso atu i lea polokalame, ae le faamanuiaina lava i se galuega.
O le toatele o nisi, ua filifili ona oloo auai uo, ae le o iai le lagona. O se isi vaega faanoanoa, ua faaaoga ia avanoa matagofie, e talosaga ai mo tupe nono e maua loa, ona le faamaoni loa lea i le polokalame na mafua ai le tusi talosaga.
O se tulaga le manuia tele lea vaega, ona ua le vaai mamao mo le lumanai, ae ua faamalie le manao o le taimi nei, ae ua galo le tele o le afaina i le taimi e manaomia ai le toe faaauau o le aoaoga i le lumanai.
E faanoanoa lava ona oloo matauina pea le fiugofie o o tatou tagata, aemaise lava, e le gata i tupulaga ua faatoa uma mai aoga maualuluga, ae ua faapea foi ia i latou oloo avea ma ulu o aiga, ia poo taitai foi i nisi o vaega o faalapotopotoga ma ekalesia o galulue ai.
E matua lagona lava le mafatia ae faia ni filifiliga faapea, aua o se faataitaiga maualalo tele lea mo nai fanau mo a taeao.
E ese le matagofie o le matauina o i latou na faia le filifiliga ona o le fia maua o se taunuuga manuia, ma ua vaaia ma faamaonia le matua galulue punouai ina ia maua le sini o le faamoemoe. E le taumate lava le taunuuga manuia o o latou faamoemoe.
O le taimi nei, ua tele ma anoanoai polokalame ua ofoina e tapena ai mo le faaauauina o le aoaoga ina ia ausia ni tusipasi taualoa e maua ai ni galuega totogi lelei.
Ae taua lava le filifili tatau. Ia matua sailiili lelei poo fea e agai iai le taumafai, ao a foi nisi avanoa e maua pe a faaauau atili.
E lelei lava le matua malamalama lelei, e maua ai foi le fiafia e faaauau, aua o lea ua e malamalama i le taunuuga.
E tele foi ni auaunaga oloo latou ofoina ni polokalame e sauniuni ai mo le aotauina e avea ma faiaoga.
E tatau lava le malamalama lelei i aiaiga o polokalame ma lona faatinoina, ina ia mautinoa le talafeagai o i latou e faatinoina, ona o tupe oloo nonoina ma e toe totogi, oloo totogi ai i latou oloo faafoeina.
Afai ae faaletonu le faatinoina ma le faafoeina, o lona uiga o tupe alu le aoga ia tupe na nonoina.
O le ala lea e matua tatau ai le filifili tatau o ni polokalame anagata e tapena ai e le gata i le fanau, ao tatou uma ina ia maua se taunuuga manuia e faafiafiaina ai tatou uma.
Manatua, e tatau ona aoga tupe oloo totogi ai au polokalame. E le gata ona manuia ai le auaunaga, ae ia silisili ai ona e fiafia e faaauau lou aoaoina mo se lumanai lelei mo oe ma lou aiga atoa.
Oloo tele lava ni auaunaga oloo latou ofoina ni polokalame i le Laasaga 3 ma le Laasaga 4, e tapena ai mo le faaauau ina ia maua le tikeri i le faiaoga.
Filifili ma le mataala le auaunaga, ia mautinoa, poo ai e faafoeina ma faatinoina, ina ia taunuu lau o lou faamoemoe.
O le tele o nisi auaunaga, e manatu o le Laasaga 3 & Laasaga 4, ona manatu lea e soo se isi lava e faatinoina. Ae manatua, o le vaega sili lea ona manaomia ai le lelei o le tapenaga, ina ia solo lelei ma fiafia le amataga o le Malaga faaleaoaoga, ina ia ausia le sini o le faamoemoe. E taua tele le FILIFILI TATAU.
