Pulega fou fusuaga

Pulega fou fusuaga

Ua filifilia nei le pulega fou o fusuaga a Samoa talu mai le maea ai o le faamasinoga mo le itu tau taaloga e pei ona poloaia ai lenei faalapotopotoga  ina ia faataunuuina le toe faafouina o le tele o vaega ile faavae o le faalapotopotoga o fusuaga ua loa tausaga o tauaveina mai e le faavae tuai. E pei ona silafia na tofia ai e le faamasinoga o taaloga se komiti le tumau ina ia gafa ma le faatamoeina o polokalame o fusuaga a le atunuu faatasi ai ma le soalaupuleina o nisi o mataupu ile lotoifale o le faalapotopotoga o fusuaga amateur a Samoa.

O le Aso Gafua o le vaiaso talu ai na fonoa ai loa kalapu fusu e ono i totonu o le atunuu i sana fonotaga faa le tausaga faapitoa ina ia filifilia ai sana laulau fou e tauaveina galuega a le fusuaga seia aulia atu le masina o Mati o le tausaga fou lea ua faamoemoe e tatau ona faatoa faia ai loa le fono faa le tausaga masani. O le tasi lenei o faalapotopotoga taaalo na matua samala ai i faamatalaga a le taitai o le atunuu le Afioga ile Alii Palemia ia Tuilaepa Sailele Malielegaoi ona o le tele o faaletonu na aliali mai ai i lona lotoifale aemaise lava i lana pulega.

O le laulau fou mo fusuaga a Samoa ua filifilia nei e aofia ai le tofiga o le Peresetene fou ua pale mai ai susuga ia Papali’i Tagaloatele Pasi Poloa.

O sui peresetene e to’atolu ua tauaveina lea e iai Fesola’i Vaaiga Tuigamala, Leituala Fifita Tapusoa ma Tofilau Fa’afouina Milford, o le teutupe ua filifilia ai nei le sa avea talu ai ma failautusi le susuga ia Faletolu Su’a, ao le tofiga o le Ofisa Sili, o se tasi o tofiga fou ua aiaia i lalo o le faavae fou, ua filifilia ai le susuga ia Laulu Tu’ugatiti Leauanae mai le kalapu fusu a Malisi.

E ono lava kalapu fusu eseese ua maea ona resitala faaletulafono i lalo o le faamalu a le faalapotopotoga o fusuaga amature a le atunuu e aofia ai le kalapu fusu a Malisi, o le kalapu fusu a le Plantation, Upolu ma Savaii, Tumua ma Pule Fealofani, Palauli ma Faasaleleaga ma le kalapu fusu a le Itu o Tane. I le laulau fou ua filifilia nei o lo o manino mai ai le leai o se sui mai i kalapu fusu mai ile motu tele i Salafai.

I le faaiuga o lenei faiga filifiliga na matua faateia ai lava le susuga ia Papali’i, ona na ia taua le tele o feeseeseaiga na tulai mai i fusuaga e pei ona oo ai ile faamasinoga ile tuana’i, e lei iai foi sona manatu o le a tusilima ia te ia e avea ma Peresetene fou, peitai e lagona le loto maualalo ma le faafetai ona o le faatuatuaga ua tuuina atu e kalapu ia te ia e nate tauaveina ai lea tofiga maualuga.

O Papali’i ua 69 tausaga le matua o lona soifua mai ile Afioaga o Saleimoa ma Aleisa, ma o se tasi o tamalii fai pisinisi iloga ile atunuu. O le lu’itau tele o feagai nei ma le laulau fou o le tau sailia lea o se nofoaga e ogatotonu iai galuega a le fusuaga i Samoa, aemaise o le tapenaga tele mo le talimalo ai o Samoa i taaloga a le Pasefika ile tausaga fou, faatasi ai ma le tapenaga o le motu tele i Salafai e talimalo ai ile fusuaga i taaloga nei a le Pasefika.

Ua faamautu mai foi le auai ai o Papali’i e fai ma sui o Samoa ile fonotaga tele a le faalapotopotoga o fusuaga a le lalolagi e faia ai i Moscow i Lusia ile masina fou.

O lea fonotaga e na’o le toatolu lava sui mai ile faaitulagi lenei o le Oceania, e aofia ai Edgar Tanner mai Ausetalia, Gay Uera mai Nauru ma Papali’i Pasi Poloa mai Samoa.

O le faaiuga foi o le tausaga lenei ua faamoemoe le pulega fou o fusuaga a le atunuu e tatau ona faalauiloa aloaia mai ai le lisi o tama ma teine fusu e filifili mai ai se au malosi mo Samoa i taaloga a le Pasefika ile tausaga fou 2019.