E tele alo o le atunuu ua faamanuiaina i taaloga tau lakapi ae iai se alo o le atunuu o alala lona aiga i Brisbane le alii o Anthony James Milford (19 tausaga) ua alualu foi i luma lona tulaga tau taaloga e pei ona amata mai i le 10 o ona tausaga.
O ona mātua o le tina ia Polu Tenisio Milford (Nofoalii & Leulumoega) ma le tama ia Alo Milford (Fasitootai) O Anthony Milford na pikiina mai le ‘au a le Toa Samoa lea o loo taalo ai i le UK i le taimi nei.
O se alii sogasogā ma taalo lelei e pei ona taalo ai i le ‘au a Canberra Raiders NRL. E ui ina salalau le tala i ni tupe tetele ua ofa mai e le ‘au a le Canberra Raiders e toe taofi ai o ia pe a toe taliu mai ona o le a pikiina o ia i se ‘au a Kuiniselani, peitai na fesiligia ona tuaa ma la saunoa ai e faapea, se‘i tuu pea ia Anthony ma lana manager poo fea a agai i ai auā e lē o naunau i ni tupe tetele pau le la faanaunauga o le saogalemu ma maua e si o la alo le fiafia i le taleni ua faamanuiaina ai o ia e le Atua.
O lona olaga taalo na amata mai i le 10 o ona tausaga i le lakapi Iuni Ipswich i le ‘au a le Ranges e tausaga atoa. Talu ai ona ole mamao tele lea na mafua ai na sui atu i le kalapu a Acacia Ridge amata ai i le Under 11.
Na ia taalo foi i le au a South Logan i le Under 15. E pei o ‘au na e piki ai tamaiti mo le ‘au a Canberra Raiders. O le iai o Anthony James Milford i le Year 8 agai atu i le Year 12 na maua sana sikolasipi ma faaaoga fua e ala i le faatupeina e le ‘au a Canberra Raiders a o aoga lena i St Peters Claver i Riverview.
Na mae‘a lana Year 12 i le 17 o ona tausaga ona alu lea i Canberra ma taalo ai i le SG Ball a Raiders e lei mae‘a ae siitia lona tulaga i le Under 20.
Na pikiina foi ma taalo i le Origin Under 20 a Kuiniselani sa avea ai ma kapeteni i le tausaga lenei 2013.
O Anthony o se tasi lenei o alo o le atunuu i Brisbane o loo taalo i le ‘au a le Toa Samoa lea o loo taaalo i UK i le Ipu o le lalolagi e pei ona silafia.
