O le filemu mai le Atua, e lē faatauina i tupe poo ni tofi. O le filemu e maua i le amiotonu. Tele taimi tatou te taumafai e tausi le filemu. E lelei, o le aoaoga lea a le Tusi Paia. Ae aogā vevesi e faamausalī ai le filemu moni, aemaise pe afai o filogia ma oleolega, poo tauilo mea silisili mai mea lelei.
O Palemene faatemokarasi e iai Ituagai. O latou matafaioi, lagalaga mataupu ‘anoa ma mata’itū atina’e manuia. Faaleo manatu tāua, ma faamanatu i pulega lana anavatau ma folafolaga. O taaloga e pei o lakapi e lua autaaalo, e finau ma tauivi ia manumalo. E aliali tomai ma agavaa, e faaalia foi vaivaiga ma lape, ae ia finau e tusa ma tulafono e pei o la Paulo. Aua le fia sili, ae tausinio i le amiotonu.
Sa feteenai Iesu ma ona soo, sa siisii lona leo ma fai atu, ‘…tou te fia o foi ma outou? ae tali ane, o fea a matou o iai o ia te oe upu o le Ola?’ Ua mautinoa, o loo afīfī i tiga le alofa, ina ua latou maua le filemu moni.
IESU TETEE
Sa itagia Iesu, auā sa aai ma tagata agasala. O feteenaiga tatau, sa a’oa’o ai le finagalo moni o le Atua, ia aua le faailogatagata, o le filemu moni lea. Sa ave ona soo i totonu o le matagi, ma toe vavao, ia aoaoina le faatuatua, aveese le fefe, auā e maua le filemu ia te Ia. Sa fulifaō laulau o le malumalu, sasa ma tutuli le au faatauoa, ia faailoa le matapeapea ma le faagaoi ua faia i totonu o mea paia, ma aoao i le ausoo, aua nei faia amioletonu, o le filemu moni lea.
Sa faatuatuai na alu ane i le ma’i o Lasalo, sei tuu ai pea ia oti, ina ia faailoa lona mana toetu. Ma tau atu, o sē faatuatua ia te ia, e ui lava ina oti, ae ola pea. Sa fefinauai ma taitai o le lotu, se’i faamanino ala moni o le faaolataga, ae lē o tulafono ma faiga faafoliga ua masani ai. Sa ia faamatala, o le faafoliga, e pei ni tuugamau, ua sinasina fafo, ae tumu i ivi o tagata oti.
Sa saunoa i faataoto, se’i tuutuu i le loloto manatu o le aufaalogologo, ma a’oa’oina lona ausoo i aano moni o ana saunoaga. Sa tuu ona soo e malaga, ae fefinauai ai poo ai e sili i le malo o le Atua, ae a’oa’oina ai, a lē liua e pei o tamaiti, e lē faasaoina se tasi.
Ae faamanino ina ua tago i le solo ma le apa fafano, ae mulumulu vae o ona soo ma apoapaoai, ia faapea ona outou fai. Ua ia silafia le faamamapo i tofi, ae aunoa ni auaunaga e manuia ai nisi. Faapei o ia, e auauna atu, ae lē ina ia auauna mai.
Sa leai se autau e puipui ina ua osofaia e tagata, e a’oa’o ai o lona malo e le faaletino, pe faapolokiki, ae mai le Atua. Ma sa maliu i se oti matagā ma le faalumaina, se’i a’oa’oina le agaga faamagalo, ia mafai foi na tatou faamagalo isi.
Ina ua siitia i le lagi, na vaavaai atu i ai molimau ma le upu e toe afio mai, ae lē iloa poo afea, se’i a’oa’oina tatou ia sauniuni i taimi uma.
O le tele o lona soifuaga, sa feteenai ma le aufailotu, lona aiga, aemaise le autausi tulafono, a o ona faalupega o le Alii o le Filemu. Afai o lea, aisea e feteenai ai ma isi? Aua o lona filemu, e le pei o le filemu o tausisia e le lalolagi.
O lona filemu e faavae i le amiotonu. O ia e iai le pule, ae auauna. O ia e iai le mana, ae loto maualalo. O ia o le tupu, ae fai ma pologa. E afio i le lagi, ae fanau i le falepovi. O ia o le alofa, e suafa foi ia Taumasui. O le Alii o le ola, ae maliu i tuāpa o Ierusalema. O le Alii o le Filemu, ae tetee i mea pepelo.
ELIFASA LE TIMANU
Ua ma’i tigaina Iopu, ua alu ane Elifasa ma le manatu, e tatau i lana uo o Iopu ona faamasani ma le Atua, e maua ai lona filemu. O le natura tagata lea, a pagatia ona manatu lea o le agasala le pogai. A o Iopu e amiotonu. O le pule a le Atua na puapuagatia ai. Na ia maua le filemu o le Atua i totonu o lona ma’i, ma faapea ane i lana avā, “…ua e tautala mai, e pei ona tautala mai o se tasi o le vao fafine valea…” Sa filemu lona agaga. O le tofotofoina o lona faatuatua, e a’oa’o ai tatou ia faatuatua i le pule a le Atua.
MAHONRI SCHWALGER & SRU
Uma le Ipu o le lalolagi, mataina le Manu i ona faiva alofilima, ae alia’e faafitauli na natia i tausaga e tele. Ai sa tausi le filemu ona e mumusu i tauvalea. Mumusu ne’i lē toe filifilia, poo le fefefe i tama matutua. E matamuli ne’i tauvalea le igoa, a mea ua faitala pe faafiapoto, ae faaufiufi lape i tausaga e tele.
Talofa i le Manu Samoa, talofa i tamalii o le pulega, auā e leai se isi e selau pasene sona atoatoa. A o lea ua aumai le laolao, e su’eni ma vailiili faapogai o faaletonu. Ia tuufesili ma sasaa le fafao, auā e afua nei le filemu moni o tama fanau o Samoa mo a taeao. E tiga nei ma auli nei, ae laei ai taeao. E aogā faaletonu o nei e manuia ai taeao.
O le filemu saili, e lē ina ia faalumaina se tagata, ae ia tauleleia nei ma taeao. O le saunoaga a lē sa Palemia o Initia o Mohandas Gandhi, ‘afai tatou te tausisi i le upu; mata e sui ai le mata, e uma ane ua mataiivi uma tatou’. Soifua.
