E finagalo le Atua ia maua e lana fanau lona filemu, ma ia saofagā i lona manuia e faavavau.
Roma 5:1 “O lenei, ua tauamiotonuina tatou i le faatuatua, o lea ua tatou lelei ai ma le Atua, ona o lo tatou Alii o Iesu Keriso”.
O le mau lea a Ioane 3:16, “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau”.
O le Atua lava ua ia sauni le ala e tasi mo le tagata ia manuia. Auā o loo galue foi le tiapolo i ana togafiti e faasese ai tagata, ma ia o ese mai le finagalo o le Atua.
Silasila i le Ioane 10:10, “O le gaoi, e leai se tasi mea na sau ai na ona ia gaoi, ma fasi, ma faaumatia; a ua ou sau ina ia latou maua le ola, ia maua atili ai lava.” O le finagalo lea ma le naunautaiga o le Atua ma tatou uma.
Ae aisea e lē maua ai e le tagata le filemu moni?
O le agasala. Peitai, na faia tatou i le faatusa o le Atua, e foliga ia te ia. O lona finagalo foi ia iu atu le tagata ia te ia, o le palealii o ana galuega sa fai. E lei faia tatou ia pei ni masini e okometi manatu, lagona ma filifiliga e fai, ae ua aumai le loto faitalia e filifili ai.
Ua filifili tagata e lē usiusitai ma ola i ona lava manatu. O le pogai lea o le agasala ma lē maua ai le filemu na folafolaina.
Fetalai le Tusi Paia i le Roma 3:23, “Aua ua agasala tagata uma lava, ma ua le oo i le viiga mai le Atua.” Toe faamaoti mai e faapea, “Aua o le oti, o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu.” (Roma 6:23)
O a tatou filifiliga ua vavamamao ai tatou ma le Atua. Ua motu ma le taula, ua tafea i tafega o faaosoosoga ma tuinanauga. Ae a oo loa ina puapuagatia, ona taumafai lea e aapa i le Atua e ala i galuega mamate.
Faataoto 14:12, “O iai le ala ua tonu i le manatu o le tagata; a o lona taunuuga, o ala e oti ai.” O lona uiga, tatou te taumafai e foi i le Atua i le toaga i le lotu.
O se mea lelei tele. Ae lē mafai e le lotu na faaolaina tatou. O le galuega a le ekalesia, na te faasino tatou ia Iesu tatou te ola ai.
E leai se isi lava auala poo se atamai, poo ni galuega e mafai ai e le tagata ona taunuu i le Atua, vaganā le galuega ma le auala na saunia e le Atua e toatasi mo le tagata.
O le Satauro. Na maliu Iesu i le satauro, tanumia i aso e tolu ma toe soifua mai. Ua ia totogi a tatou agasala, ma fai ai o ia ma puluvaga i le va o le tagata agasala ma le Atua Paia.
1 Timoteo 2:5, “Aua e toatasi le Atua, e toatasi foi le puluvaga i le Atua ma tagata, o le tagata o Iesu Keriso lea.” O le mau a le aposetolo o Peteru, “Aua o Iesu Keriso foi na tigaina o ia faatasi mo agasala, o le amitonu o le sui o le amioletonu ina ia taitaiina e ia o i tatou i le Atua…” (1 Peteru 3:18), Roma 5:8.
Ae tatau ona fai sau filifiliga. O le Atua e tamālii, na te lē faamalosia oe ina ia filifili le ala tonu. O lau lava lea faitalia.
E faigofie le ala i le Atua, pe a manatu le tagata poto, o ia e valea. O le tagata valea, e manatu o ia e poto. O le tagata poto la na te silafiaina lona lē atoatoa ma le lē agavaa, ma filifili ai na te manaomia se isi e malosi atu e faatuatua i ai. O Iesu lea.
Molimau le Faaaliga 3:20, “Faauta, ou te tu i le puipui ma tuitui atu; ai se faalogo mai i lo‘u leo, ma tatala mai le puipui, ou te ulufale atu ia te ia, o ia foi ma a‘u.” E matautia le maualuga o lea valaau ua aumai mo le tagata.
O le taliaina o lea valaau, o lau lea matafaioi. O le filifiliga fai toatasi la lea e feagai ma tagata uma. Pei o le Ioane 1:12, “A o latou uma na talia o ia ma faatuatua i lona suafa, na ia avatu i ai o lea manuia, ia avea latou ma fanau a le Atua.”
O fea o e iai? O ā mai lau folauga i lenei tausaga? Afai e moni lou fia maua o le filemu ma le manuia o le Atua, e tatau ona faatuatua nei ia te ia ma faapea: O a‘u o le tagata agasala, ou te manaomia le Faaola. Ona filifili lea e liliu mai ou ala sese ma salamō mai au agasala uma sa fai.
Ona tatalo lea ma faaulufale Iesu i lou loto, na o Ia e magalo ai au agasala, ma fai o Ia ma uo. Na te lē tulia oe, ua sauni o ia e faafeiloai oe pe a e valaau atu. Silasila foi i le 1 Ioane 5:12-13, “O le ua ia te ia le Alo, o ia te ia le ola; o le e le o ia te ia le Alo o le Atua, e le o ia te ia le ola.
Ua ou tusi atu nei mea ia te outou o e faatuatua i le suafa o le Alo o le Atua, ina ia outou iloa ai ua ia te outou le ola e faavavau, ina ia outou faatuatua foi i le suafa o le Alo o le Atua.” Soifua.
