Fiaola solo le au volipolo a Samoa i Noumea

O se lipoti faalumaina ma le tauvalea, lea na maua mai i Taaloga o le Volipolo sa auai atu i ai le au Voli a Samoa i le Taamilosaga o le Oceania Volleyball Championship. O le masina na tea nei na faataunuuina ai lea taamilosaga i le aai o Noumea i Niu Kaletonia, lea sa ia Samoa le Siamupini o lea taamilosaga talu ai.

E tele ni lipoti ma ni molimau matagā na faasalalauina ma tuualalo ai le atunuu, ona o le lē lelei o le faamaopoopoina o lea faamoemoe, lea ua tuuaia ai le Pulega o le Taaloga Volipolo i Samoa. O nisi o nei molimau o loo ta‘ua ai le totogi lava e le tagata ia o lona pasese, leai se togiga a le au taaalo, leai se nofoaga e faamautu i ai, faaletonu ni avanoa e ulufale ai i nofoaga o taaloga, leaga le fesootaiga o tagata taaalo ma le Pulega, faatasi ai ma le toetoe lava a leai se avanoa i le taamilosaga ona o le faiaga atu i le atunuu na fai ai le faamoemoe.

O se tasi o sui o Samoa sa filifili e fai ma Laufali o le Taamilosaga na ia ta‘ua, e $6,000 lava lana seleni na totogi ai lona lava pasese e malaga ai i Niu Kaletonia mo le taamilosaga, ae ua laki o lona vave lea na mafai ona taofi ai le avanoa e tauva ai Samoa semanū e faaleaogā ona o le faiaga, ma iu ai ina lē taalo i le taamilosaga o Voli i le Oneone (Beach Volleyball) faapea foi ma se isi molimau mai le au malaga o loo ta‘ua ai e faapea, ana leai nai māfine Samoa e alaala ai i Noumea, e lē maua se isi fesoasoani e ala i le totogiina o fale na api ai le aumalaga.

O le iuga o le Taamilosaga ua mamulu ai le Siamupini o Samoa talu ai, i le vaega o tamaitai e 8 ‘au na tauva ae tulaga 5 ai Samoa, a o le vaega o alii na tulaga 4 mai le 6 o atunuu na tauva ai. O loo matuā teena malosi e le Peresitene o le Asosi Volipolo a Samoa ia Tupuola Vaa Potoi ia tuuaiga, faapea foi ona lē taliaina e le Faalapotopotoga o Taaloga i le atunuu le SASNOC nei faitioga, o loo suesue mālie pea le faamaoniga o molimau ua lāgā e le autaalo a Samoa, ae o le mea mautinoa, ua faamaasiasi ma tauvalea ai le igoa pele o le atunuu.