Ua galulue faatasi le alii faiata mālie ua lauiloa foi i ata tifaga o loo ia tusia ma faatinoina, le alii o Oscar Kightley ma le vaega a le Water Safety New Zealand, ina ia lē gata e a‘oa‘oina lana aau i lenei taumafanafana, ae iai le faamoemoe, o le a faaosofia ai foi le toatele o isi tagata Niu Sila e faia pe a‘oa‘oina lea tomai aogā o le aau.
O Mr Kightley, ua 43 ona tausaga, o le vaiaso talu ai lea na amata ai ona fai ana lesona aau, ma o loo faatulaga sana tuatusi i luga o le upega tafailagi, le watersafety.org.nz/oscarkightleyswims e fai ma faamaumau ai mea eseese na faia i ana lesona aau. Ta‘ua e Oscar, o lona olaga atoa e tele taimi e agai ai e taeele i le sami mo tafaoga, ae mai lena taimi atoa, e lei mafaufau lava e a‘oa‘oina lelei lana aau. O le 20 ma ona tupu o tausaga o Oscar, na iai se mea na tupu a o taaeele i le sami, ma na toeitiiti lava a malemo ai ina ua toso o ia i tai i le malosi o le tatafe o galu.
Ae o lenei la ua amata ona ia a‘oa‘oina le tomai e aau ai, ma ua fiafia foi ona ua mafai ona feausi faatasi ma ana uo, ma o lona moomooga lea ina ia mafai ona faaosofia mai ai ma nisi tagata e a‘o a latou aau.
Na faaosofia le naunau o Oscar e a‘oa‘o lana aau, ina ua faalogo i le maualuga tele o le fuainumera o tagata Niu Sila o loo malelemo i tausaga taitasi, aemaise lava le toatele o nai fanauiti ua malelemo ona o le lē iloa aau. Lea na manao ai loa ua tatau lava ona ia faataatia se faaa‘oa‘oga lelei.
O se faataitaiga ua faafiafiaina ai le pule sili o le Water Safety New Zealand, Matt Claridge, ma e iai lona talitonuga, o le iai o se tagata lauiloa e pei o Oscar, ua naunau ia iloa aau, o se avanoa lelei tele e faaoo gofie atu ai lenei feau tāua i isi tagata e lei maua foi lenei tomai.
O alii, aemaise lava alii Pasefika o i latou na o loo toatele ai le aofai o ē malelemo ona o le lē silafia aau, ae mautinoa o le a avea Oscar o se tasi e faaoo atu ai lena feau mo le puipuia o le saogalemu pe agai i le sami ma vai taele.
Ma e lē gata o loo a‘o le aau a lenei alii tautaua, ae o le a latou a‘oa‘oina foi ia te ia ni tomai e mafai ai ona ausia nisi o ana moemitiga ua leva ona fia manao e faataunuu, e pei o le alu e tietie vaa i le sami, e fia faasee foi i galu, ma feausi solo i le sami e aunoa ma le fefe ne‘i malemo.
O le Water Safety New Zealand o se faalapotopotoga na faavaeina i le tausaga e 1949, o loo nafa ma le faia o aoaoga i le puipuia o le saogalemu pe a agai mo taelega i sami ma vaitaele.
