E mae‘a le faamoemoe o le faamalosi a le aulotu a le EFKS Weymouth i le Aso Toonai, aso 21 Iuni 2014, ua mautinoa ai foi ua faasaolotoina mai aiga ma matafale galulue toatasi uma mai i le galulue punouai pea mo le totogiina o meatotino sa faavaeina mai i le tele o tausaga ua tuanai atu.
O se fiafiaga sili lava ona o lea ua matuu atu lea avega sa fai pea ma vaaiga i le soifua galulue o tagata lolotu, ma ua maua tagata uma i le lagona o le faagaeetia, o le faafetai ma le faamanū e faateleina ai le viiga o le Atua, ina ua mae‘a nei ma talitonuina ua mamā le aitalafu i le faletupe ma ua faasaolotoina mai ai le igoa o le aulotu mai le tulaga o aitalafu.
O le saunigalotu masani i le Aso Sa na maitauina ai loimata maligi o le loto fiafia ma le agaga faafetai i le Atua, aemaise foi o le faafetai a le susuga i le faafeagaiga, Susuga Silo‘a Lologa i le aulotu ina ua taunuu le faamoemoe ma ua faasaolotoina mai ai le aulotu mai le soifua aitalafu.
“Ia taitasi ma foai e pei ona filifili i lona lava loto, aua ma le tiga, aua foi ma le faatauanauina aua e alofa le Atua i le ua foai ma le loto malie.” O le matua lea na faamamafaina sa fai ma molimau a le susuga i le faafegaiga auā ua talafeagai lelei lava lea fuaitau ma le tulaga ua iai nei le aigalotu.
E leai se aigalotu na faaletonu le foai e tusa ma le faamalosi auā na amata faamaopoopoina mai lava i le amataga o le tausaga, a o lea ua faaiuina ma ua ausia ai se vaega tupe e $78,500.00, ua sili manao atu nai lo le aofaiga o le aitalafu a le ekalesia na totoe e tusa ma le $38 afe, ma ua mafai ai loa ona faamamāina uma le aitalafu ma ua nofo saoloto ai nei le ekalesia.
Auā ua mae‘a le galuega ma ua manuia ma lelei mea uma, ona matou faapea ane lea, Ia matuā viia pea lava pea le Atua ma ia faateleina le faamanū i lona alofa ma lona agalelei e tusa ma le soifua galulue ma le loto foai ma le aao mafola o aigalotu uma aemaise lava foi o aiga, uo ma aumea mamae a le aulotu ia i latou uma sa togimaa e lē gata o le faamoemoe i le Aso Toonai ae faapena foi i soo se sailiga tupe sa faagasolo mai i tausaga ua tuanai atu.
Malo le onosai faafetai le galulue punouai mo feau ma galuega e faataunuuina ai le finagalo o le Atua ma le talalelei.
