E ui o le filifilia o Tessa Ofe Wong King i le au a Ausetalia, ua mautu lona taofi e fia tautua pea i le au netipolo i lalo o le Luasefulutasi tausaga a Samoa.
O le tausaga nei na siamupini ai Ausetalia i le netipolo i le lalolagi i lalo o le luasefulutasi. Sa iai Tessa i lenei aufili maoae i le tulaga o le puipuiga o le mama poo le Goal Defence ma le Goal Keeper.
E manatu nisi e ono faigofie se avanoa o Tessa i le aufili tele a Ausetalia i le lumanai pe a fua i lana puipui malona malosi. Ae peitai ua tonu ai upu a le atunuu, ‘e lele lava le toloa ae maau i le vai’.
E le faagaloina e Tessa lona tupuaga i Samoa e pei ona malaga mai ai lona aiga i Sini nei i le vaitau o le 2000 mo se lumanai manuia.
Na aoga o ia i Bonnyrigg Heights ma o le EFKS a Fairfield oloo tapuai ai lo latou aiga. O se aiga talenia e afio mai ai lenei tamaitai talavou.
O lona Tina o Vailoa mai le afioaga o Vailoa i Aleipata. O si ona tamā ia Semu Ofe Wong King e mai Vaiala ma Uafato i Fagaloa. Sa avea lenei tamā ma faiaoga o le aufili Soka a tamaitai Samoa i le vaitau mai le 1990.
O lona uso ia Faoa Ofe Wong King na avea ma sui o Samoa i faipelega faavaomalo faapea foi Lautapaa Ofe Wong King i le Bantam Weight ua tele ni pine Auro na ia ausia.
O le faailoa ai nei e Tessa lona faamoemoe e fia tausinio mo Samoa e ui oloo taalo nei mo Ausetalia ua fai ma laasaga tele ona o le tele lava o tamafanau a le Pasefika e tau leai nisi e toe fia taliu e fesoasoani i autaaalo a Samoa, Toga ma Fiti.
O se faaiuga lotonuu ma sa ia faafetaia ai le agalelei o le Atua i lana taleni faapea le susuga i le Faafeagaiga ma le faletua o lana Ekalesia i talosaga ma upu faamalosi.
E le Gata i lana Ekalesia ae na momoli foi lana faafetai tele i ona mātua uso ma tuagane i le tapuaia o lona alofaiva.
Ua sauni nei e saili sona avanoa mo le tauvaga o le Oceania sosoo atu ai ma taaloga laiti o le Pasefika faapea taaloga a Malo o Taupulega i le 2014.
O le loto toa o Tessa i lana faaiuga e ono avea ai ma se kapeteni iloga a le au netipolo a Samoa mo le lumanai.
