Na agiga i lipoti tusitusia i le vaiaso nei e pei ona lomia i luga o le upega o fesootaiga le Manchester Evening News e faapea, o loo lavea le igoa o le alo Samoa, ManuSamoa Tuilagi i le lisi o tama taalo lakapi iuni o loo ua vaavaai i ai le alii faipisinisi Marwan Koukash o ia foi o loo pulea le kalapu liki (league) a le Salford Red Devils i Peretania, na te fia faatauina nisi o tama taalo lakapi iuni mai isi kalapu ma faataaalo i lana kalapu liki, le Red Devils, lea e aofia ai ma Tuilagi. “O le a ou faatauina mai ni tama taalo lakapi iuni lelei, o lona uiga very top players, o loo ua iai tama taalo ua taulai i ai le vaai, ma afai o le tulaga lea e mafai ona matou faia, o le a faia lava,” se vaega o le faatalanoaga a Koukash i le Manchester Evening News.
Ua mafua lea saunoaga e pei ona ta‘ua, ona o le lē fiafia o Koukash i le faigofie ona faatau atu o tama taalo lakapi mai le liki (league) ma taaalo i le iuni, e pei o Sam Burgess lea ua suia mai le kalapu a le South Sydney Rabbitohs ae see ma taalo mo le kalapu a le Bath i Egelani. Peitai o loo matuā teena e le CEO a le Tigers, Simon Cohen nei folafolaga agai ia latou tama taaalo ma e lē o iai se fuafuaga lata mai a Tuilagi ma lana pulega e ono talia se ofa mai le Salford pe faamatuu foi nisi o a latou tama taaalo e tusa lava poo le ā se tau e mafai ona ofoina atu. E foliga mai ua na o ni mafaufauga faivavale lava a Koukash ma le Red Devils e moomoo ai mo Tulagi ae e matuā lē mamulu lava le Centre a le Tigers. Ta‘ua e Cohen, o Tuilagi o loo taalo i lalo o lana konekarate, toe lua tausaga o loo totoe e taalo ai mo le ‘au a Leicester. Faaalia foi e Cohen, ai se‘i vaganā o ia o Bill Gates ona lavatia lea ona totogi le transfer fee ma e lē taitai gafatia e le seleni a Koukash ona faatau Tuilagi.
Pei ona silafia o Tuilagi o le tasi lea o tama o le auuso Tuilagi o loo taaalo lakapi i atunuu i fafo, ma o ia lea o loo taalo i le ‘au a Egelani ma le kalapu a Leicester Tigers i Egelani lava. E aga mālie felafolafoaiga a pulega a kalapu eseese nei ma e lē fua tasi i se Pulega lea tulaga, o le malosi o le tupe e faatino ai soo se fuafuaga ma mafai ona puleaina ai le lumanai o nai tagata taaalo. Ae ui i lea, o le talotaloga ia mautu ma maua ni lumanai manuia o nai alo ma fanau o loo saini konekarate e taaalo ai i atunuu i fafo, ae lē o le fefinauai e faatau i tupe faapenei lo latou malosi ma le lumanai.