Samiga tatau a le tamā 70 tausaga o le soifua ma niso o lana fanau
O se saunoaga logomalie na saunoa i ai le tofa ia Taliaoa Tapusoa Tuipalusami Sione Faagutu ina ua faatalanoaina, na mautinoa ai lona lototele e tali tiga a o taina lana tatau pe a faatusa i le matua o lona soifua ua iai.
Ua 70 tausaga o le tamā matua ma o se tamā e lauiloa i meafai a le aiga ma le nuu i Samoa (Saina Faleata & Faala).
Pei foi ona silafia e tatau ona fai soa le taina o tatau, ma na ofoina e nisi o alo o nai ona alo tamaitai ua suafa foi, le tofa ia Tapusoa Matthew Faaumu Taupo, ma Tapusoa Chanel Lorenzo Schimdt faapea le tamaitai ia Gabrielle Katherine Schmidt latou te ta faatasi.
E leai se mea e tusa ai le fiafia ma le olioli o nei foi alo na soifua a‘e i atunuu i fafo ona ua maua lenei avanoa e laei ai le tatau a Samoa.
O le isi toalua o i latou nei o alo e faasino i le susuga i le Toeaina ia Ps Andrew Schmidt ma le faletua ia Lagi faapea le tofa ia Tapusoa Matthew Faaumu Taupo, o se tasi foi o alo o le alo tamaitai o le tamā ia Taliaoa Tapusoa Tuipalusami Sione Faagutu.
Na ta‘ua e le tamā matua lona agaga faafetai ua mafai ona ia maua lenei avanoa e taina ai lana tatau ae lei goto atu le la o lona soifua.
O le tufuga ta tatau o le susuga ia Aukuso Tuaumu mai Leauvaa ae o loo alala i Sini Niu Sa Uelese.
O le afiafi o le Aso Tofi, aso 24 o Me na samaina ai a latou tatau e ala i se sauniga faafetai sa saunia lava e le susuga i le toeaina ia Ps Andrew Schmidt ma faatinoina loa aga masani i le samaga pe‘a ae faaiu i se taumafataga tele sa auai le tele o uo ma e masani, e pei ona molimauina foi e le failautusi o le Mafutaga a le Leo o Tagata Samoa i Logan, susuga ia Faamatuainu Vaaaoao Alofipo.