O loo faagasolo pea galuega a le Komisi suesue na tofia e silasila i le faatinoga o tiute o leoleo ma le mataupu na aafia ai le alii Nigeria o Okoro Williams, lea na manumalo lana tagi mo se taui faasaga i ana tuuaiga faapea, sa faaoolima nisi o leoleo ia te ia atoa ai ma le lē lelei ona vaaia ana meatotino sa tuu i le vaaiga a leoleo.
O le masina nei o Aperila na toe faaauau ai suesuega a le Komisi o loo taitaifono ai le alii Loia o Patrick Fepuleai. I le aso 16 o Mati na tolopo ai galuega a le Komisi lea sa tolopo ua amata le molimau a se tasi o Komesina lagolago le susuga Leiataua Fata Aviga Salale, o le faaauauina o lana molimau na ia faamatala ai faiga faavae o loo lima taitaiina ai tiutefai o leoleo.
Sa ia faamatala ai foi vaega uma o loo faataoto e fai ma alafua o le galuega a le Malu o le Malo. Sa fesiligia ai foi le alii Komesina lagolago pe o talafeagai le taiala o loo suesue ai e leoleo faasea faasaga i isi leoleo.
Ona o aiaiga o loo faatonutonu ai galuega a le Komisi suesue ua le mafai ai ona faailoa nisi o vaega o nei molimau ona o loo silasila muamua i ai sui o le Komisi ma faia se latou iloiloga.
O se tasi lea o tulaga o loo fesiligia ai e le toatele o le atunuu le faamaoni o suesuega o loo faia e se vaega faapitoa o le Matagaluega o leoleo ma falepuipui faasaga i faasea mai le atunuu e aafia ai nisi o leoleo. O nisi o tamaitai leoleo e iai lo la silafia i le mataupu e aafia ai nisi o Malu o le Malo ma le alii Nigeria o Okoro, sa faia foi a la molimau. O le satini sinia o Efo Moalele ma le satini o Aldora Mamaia.
O le faauluuluga foi o le vaega suesue le CID, le tofa Ulugia Matau Matafeo, sa samania e le Komisi e oo atu mo sana molimau. O le tofa Ulugia Matau o loo umia le tulaga superenitene ma o ia na taunuu i ai le mataupu ia Okoro ina ua suesueina lea alii i ni tuuaiga e aafia ai se tupe a se kamupani i Apia sa ia ave, peitai o moliaga o le gaoi faasaga ia Okoro na faaleaogaina ina ua le mafai e leoleo ona tuuina atu ni molimau e faamaonia moliaga. O le failautusi a Ulugia le tamaitai o Rosita Galuvao sa faapea foi ona samania e le Komisi mo sana molimau.
O se tasi o leoleo o Ioane Tavai sa ia faamatala foi i lana molimau vaaiga sa ia silafia i le faaoolima na faia i le ofisa autu o leoleo a o taofia le alii Nigeria faapea le aso 20 o Ianuari o 2012 i le malaevaalele i Faleolo.
O le aso lea na tuu e aveese ai Okoro ma Samoa, peitai sa le mafai ona faataga e le kapeteni o le vaalele a le kamupani vaalele o le Ea Pasefika ona malaga ai le alii Nigeria.
O le molimau sa tuuina atu i le suesueina o le tagi a Okoro e le faamasinoga maualuga na ta‘ua ai, sa saisai lima ma le gutu o le alii o Okoro, le mafuaaga na musu ai le pailate e ave lea alii faatasi ai ma le pasese agai i Fiti. O loo faaauauina pea suesuega a le Komisi suesue.
