Fia fesoasoani pea tama tuai o Sanele i fanau o a‘oa‘oina i le kolisi i Samoa

O le loto fesoasoani ma le agaga alofa ua lē mafai ona muta e ui lava ina taugata le soifuaga i lenei vaitaimi, peitai, a talitonu lava le tagata ma faatuatua e tauia e le Atua galuega lelei uma lava, o iina e afua mai ai lenei loto fia fesoasoani.
O le po o le Aso Toonai 7 o Iulai na faia ai le fiafia night a le Asosi o Tama tuai o Sanele i Kuiniselani nei. (Chanele College Old students Association)
O le faamoemoe maualuga o le sailiga seleni e fesoasoani atu ai i nai alo ma fanau o aoaoina i le kolisi o Sanele i le taimi nei.
O le Peresetene o le Asosi: Salā Kelemete Tito; Sui Peresetene: Malaki Etuale; Tuetupe: Maletino Fonoti; Failautusi: Sāvea Tovio Tagaloa; Sooupu: Fanomua Jake Pale.
O le afioga ia Patele Epati Tamati o le Taitai Puleaga a Kuiniselani, o ia o se tasi o tama tuai o Sanele i tausaga ua mavae. E to‘a 16 le au galulue ae to‘a 30 ua lesitala i totonu o le asosi.
Sa matagofie le lagolago a le atunuu sa talisapaia e tama tuai ma tauaaoina ma ua fuafua e tuuina ai se fesoasoani auā le manaomia o alo ma fanau o aoaoina i le Kolisi o Sanele i Samoa.
O le taumafataga mamafa sa tapenaina lava e tama tuai o le asosi faapea le lagolago malosi a nai a latou tautoga ma aiga.