E ui ina e na o le toaono le mamalu o le atunuu na auai atu i le fonotaga ma nisi o ofisa sinia o le PolyBlue, ae na taunuu lava le faamoemoe o le faailoaina atu o lo latou fia fesoasoani i tagata Samoa i Ausetalia.
Na afea le mamalu o le atunuu i Sydney e le faauluuluga o maketi ma fesootaiga a le PolyBlue, tamaitai o Andrea Heffernan ma le alii pule i Aukilani le afioga Papalii Maiava David Suisala, i le Aso Lua. Na faataunuuina lenei fonotaga i le United Church i Minto.
Na auai Rev Alan Filipaina, taitai aoao o le Ekalesia Faapotopotoga Kerisiano Ausetalia ma Niu Sila, Rev Vili Iosua ma le faletua, Tauo Toomata,(Toomata Funerals), Alalatoa Emani Alalatoa (Peresitene, La‘u Samoa Society) ma si tamā matua ia Tagaloa Tago.
I se faatalanoaga a le sui o le Samoa Times ma le faauluuluga o maketi ma fesootaiga a le PolyBlue, susuga Andrea Heffernan, na ia ta‘ua ai o le auga tonu o lenei faamoemoe, sa fia maua se feiloaiga a le PolyBlue ma taitai o Ekalesia eseese ma isi uma faalapotopotoga a tagata Samoa i New South Wales, ina ia faailoa i ai e lē gata o lana tautua masani i femalagaiga a lana vaalele, ae ao foi ona silafia e tagata Samoa o loo alaala ma papaaao i Ausetalia, le tele o nisi atina‘e e mafai ona lagolago mai ai le kamupani.
Na ta‘ua e Heffernan le tele o ni atina‘e tetele o loo tuuina atu i ai le lagolago a le PolyBlue, e pei o le National NZ Sports Awards, Pacific Music Festival, Polyfest ma le Miss Samoa.
E lē faapito foi lana auaunaga, auā e oo lava i suegatupe mo charities ma Ekalesia, e latou te lagolago foi i ai.
O le auga tonu lena o lea fonotaga sa fai, ina ia feiloai atu ma amataina se faiga paaga ma faafeagaiga ma taitai o Samoa i Ausetalia.
Ta‘ua foi e Heffernan, o le tele lava o faamanuiaga ma polofiti mai nei fesoasoani e alu uma lava i le Malo Samoa, auā e 50% le sao o le malo Samoa i le PolyBlue, ae 2% le sea o le faletalimalo a Aggie Grey. Lona uiga o le manuia ai lava tagatānuu o Samoa.
Sa faalauiloa ai e le sui o le kamupani, e tatala le avanoa mo soo se faalapotopotoga lava a Samoa i Ausetalia, e moomia la latou fesoasoani. Sa faamalamalama e le sui le auala e fai ai.
E mafai e ekalesia, ma soo se faalapotopotoga ona fai mai sa latou tusi talosaga i le kamupani mo se fesoasoani.
Ona iloiloina muamua lea e le Komiti Faafoe, ina ia faamautinoa o le atina‘e o loo talosagaina ai la matou fesoasoani, o le a iai se aogā mo matou, auā e tatau lava ona faamalieina itu uma e lua.
O lenei faiga paaga, o le a lē gata e matou te fesoasoani atu i atina‘e a faalapotopotoga ma ekalesia, ae matou te faatalitalia foi lo latou lagolago mai, e ala i le faaaogā o le auaunaga a le PolyBlue mo a latou femalagaiga. Auā o le kamupani vaalele a Samoa, e toe tului foi le tele o tupe mamā mo i latou.
E ui lava e foliga sa lei lava se taimi na logologopuialii ai le mamalu o Samoa i Sini mo lenei fonotaga, ae na faaalia lava le fiafia o le faauluuluga o maketi ma fesootaiga a le PolyBlue, le tamaitai o Andrea Heffernan, i le feiloaiga ma le komiuniti i lea aso.
Sa la feiloai atu foi i latou i taitai o nisi o faalapotopotoga Samoa i Kuiniselani, e pei ona valaaulia ai foi i le faailogaina o le tutoatasi i Ipswich, ma Brisbane. Sa fesoasoani foi lenei lava kamupani vaalele i faailoga mo le tauvaga golf sa faia i lea aso tāua, ma valaaulia ai foi i laua e tauaaoina nisi o ipu mo faailoga o lea aso taua.
