E lē tau faailoaina i le atunuu le tāua o Faatoaga ma Faigafaiva ma le sao i le atina‘ega o Samoa. O le tulaga e pei ona iai le laitiiti o Samoa ma lona Siosiomaga, e mautinoa lava o le eleele ma le ogasami ua ave uma i ai le faamoemoega e maua ai se tupe maua ae o le tausiga o aiga.
E molimau uma foi le toatele o fanau a Samoa ua nonofo ma faamautu i atunuu i fafo aemaise lava Niu Sila, o pusafa‘i ma pusatalo a mātua ia na tele ina maua ai tupe e agai ai fanau i fafo auā a‘oa‘oga ma le nonofo ai e saili galuega i ia atunuu.
O lea e oo mai i le asō o loo ‘ae‘ae pea Samoa i tupe faamomoli na amata mai lava e fanau na tuua Samoa ona o tupe na maua mai i fua o faaeleeleaga a aiga.
O le vaitau o le 1970 seia oo i le amataga o le 1980 na molimauina ai le oo atu i le 80 agai i luga pasene le tupe maua o le tala o le tupe a Samoa, na maua mai i faatoaga faapea ai faigafaiva. Na umi se taimi o avea pea le talo a Samoa ma oloa faatau atu i fafo aupito tele le tupe a le atunuu na maua mai ai.
Ae o le faama‘i o le lega na matuā lē mafai ai lava ona toe maua mai ai se tupe a Samoa ma o lea faato‘ā toe amata ona tatala mai avanoa mo le talo faatau atu i Niu Sila i le mae‘a ai o le tele o tausaga o taumafai mai le Matagaluega e sailiili ma totō isi ituaiga talo e mafai ona tetee atu i lenei faamai matautia.
O le popo mago na tapuni loa foi maketi i Europa faaletonu loa foi ma le popo e avatu i Samoa nei, ma na manino le faigata o le tulaga na oo i ai le popo mago faatau atu i fafo, o lea na tapunia ai lava ma fale tetele gaosi suauu popo ma sa faamautu ai le popo mago aua le faatau atu i fafo.
Na tele taumafaiga ina ia mafai ai ona saili nisi maketi ma na iu ina faatū le fale e gaosi ai le penu auā le avatu i fafo.
E lei leva foi lea atina‘e ae tapunia ma o lea foi faato‘ā amata ona toe faaolaola mai lea atina‘e ma ua tauanau nei le atunuu e agai i toganiu auā le aoina o le popo mo le gaosiga o le suauu lea ua maua le maketi e toe avatu ai.
E matuā pa‘ū maualalo le uta o loo maua atu i Samoa. Ua manino galuega ua faatino i le ava ma finauga ma maketi i fafo ina ua taofi le ava e avatu i Samoa.
O le nonu na tele tele foi le tupe na maua mai ai ae o lea foi ua faaletonu mai ina ua faoa uma e le nonu a Hawaii ma Tahiti le maketi. O lea ua faamautu se feagaiga a se milionea Saina ma ni tagata Samoa fai pisinisi ina ia totō ai le nonu ma la‘u atu i Saina. O le masina nei lea na faamautu ai ma le afioaga o Sasina lea foi atina‘e.
Ua galulue vaavaalua le Matagaluega o Faatoaga ma Faigafaiva ma afioaga auā le unaiga o faasao o le gataifale e ala i faisua faapea foi togatogo ia ua unaia ai le faasao o le siosiomaga ma le tau toe atia‘e o meaola o loo tataa ma ola ai i ia vaega o ogasami o Samoa ina ia mafai ona toe olaola lelei atina‘e nei.
O nei fuafuaga uma faatasi ai ma talomua ua manatu le Matagaluega o le a mafai ai ona toe foi le sao o faatoaga ma faigafaiva e avea ma tupe maua autu a le atunuu e pei ona sa vaaia ai i tausaga ua mavae.
