Ua alu ese le tamaitai o Tusisaleia Hope Pomele na faaauauina le tofiga o le Tausala Samoa mai le tamaitai o Jacinta Bourne, ae ua see atu nei le tamaitai na maua le tulaga 3 le second runner up o Taveila Nylon, e tauave tiute o le Tausala o le atunuu.
O le saunoaga a le Sui Palemia o ia o le Minisita o Tagata Tafafao, o le taitaifono foi o le komiti o le Tausala Samoa Misa Telefoni, ua malie Taveila na te tauave tiute ma galuega a le Tausala o le atunuu.
Peitai e le o mate ai i lalo mafuaaga na faailoa e le tamaitai o Tusisaleia na mafua ai ona faia lana faaiuga na lagolagoina e lona aiga ina ia faamavae i le tuanai o le lua masina ma vaiaso talu ona ia faaauau le tofiga mai le tamaitai o Jacinta Bourne na faamave foi ae o ia lea na manumalo i le tauvaga na sailia ai se lalelei o Samoa.
I se finagalo o Misa na ia taua ai, afai ua toe fia foi Tusisaleia e faaauau lana aoga i Hawaii, sa tatau lava ona faailoa atu a o lei faia lana tautinoga e na te tauave tiute o le Tausala o Samoa.
E atagia mai i le finagalo o le Sui Palemia, o le mafuaaga lea o le toe faamaamulu o lea tamaitai, ae sa ia saili se auala e alu ese ai.
O le mau foi lea a se tasi o ofisa sinia o le Pulega o Tagata Tafafao ina ua fesiligia. Fai mai lea ofisa sinia o loo iai le talitonuga ua le fia nofo i Samoa le tamaitai ona ua toe fia foi i Hawaii i lona aiga. Na taua foi e lea tagata faigaluega sinia i le ofisa o tagata tafafao, sa totogi e le STA (Samoa Tourism Authority) le pasese e alu ai le tamaitai e fai malologa i lona aiga i le faaiuga o le tausaga ua mavae ma le faamoemoe e toe foi mai i le amataga o le tausaga mo le faaauauina o ona tiute.
Peitai na logoina mai le ofisa ua leiloa le pepa o le pasese poo le ticket i le vaalele. Na toe faia feutanaiga ma totogi ai le isi tupe ma malaga mai ai loa i le amataga o Fepuari le tamaitai.
Ae na faateia le pulega o le STA ina ua faailoa atu nisi o mea ua le fiafia ai le tamaitai, ma tuuaia ai le suesue atu o lona tulaga tagatanuu, leaga le fale na nofo ai, leai se isi e faataliina o ia ina ua taunuu i le malae vaalele atoa ma isi vaega na ia laga.
I le tulaga faaletonu o le fale o le Malo i Fagalii na taua e Misa Telefoni, o le fale lea na muamua faaaoga e le Tausala Samoa le tamaitai o Cherryl Elekana ona e leai se fale o lona aiga i Samoa, na sosoo ai ma le nofo ai o le isi tausala le tamaitai o Gwendolyn ma e leai ma se faitioga na oo atu i le leaga o le fale. Fai mai le Sui Palemia e vaivai tele lea tulaga ua faasea ai Tusisaleia.
O le faatoa saunoa lea o Misa ma faaali sona finagalo i le mataupu talu ona taliu i le atunuu, ma logoina i ai le faamavae o le Tausala Samoa mai Amerika na faaauauina lea tofiga. O loo talosia e nisi ia aua nei toe aliali mai nisi faaletonu i le nofoaiga a le tamaitai ua faapaleina nei i le Tausala o Samoa.
