O le 327 o fanau e lei sue i le amataga o suega faaiu o le tausaga a le Iunivesite Aoao o Samoa i le Papaigalagala, ua toe iai nei se suiga i le faaiuga a le pulega o le iunivesite ina ua mae‘a ona faia ni feutanaiga ma le Malo. O le vaiaso ua mavae na amata ai ia suega, ae sa iai ni mafatiaga o nisi o mātua ina ua lē mafai ona sue a latou fanau ona o le mataupu i pili lē totogia ma pili e lei mae‘a.
E lē o se faafitauli e fou i le iunivesite e pei ona saunoa le pule sili poo le afioga i le Tapaau Susuga Leapai Fui Dr Asofou Soo, i se feiloaiga ma tusitala na taloina e faailoa ai le finagalo o le iunivesite i le mataupu.
Ua tele naua avanoa ua ave i mātua talu mai lava tausaga ua mavae peitai ua silasila atu le pulega o le iunivesite, ua avea le avanoa lea ma itu ua lē naunau ai nisi o mātua e faatino lo latou tiute o pili ia totogi.
“O le Iunivesite foi e pei lava o le isi aiga e manaomia seleni e totogi ai ana fuafuaga fai e pei o le suavai, le eletise aemaise o totogi o faiaoga”, o le finagalo folasia lea o le tapaau e tau faamatalatala ai le tele o vaega tāua e moomia ai e le iunivesite seleni.
O le 80 pasene o tupe faaalu e aumai i le tala autū o le Tupe a le Malo i tausaga faaletupe taitasi ae o le isi 20 pasene e faatupe e le iunivesite e ala i pili o fanau.
E lata i le 300 afe se vaegatupe o pili le totogia ma pili e lei mae‘a aemaise o pili ua tai lima tausaga o taatitia e lei totogia uma lava. O nisi o fanau o loo ave pea i ai le avanoa, peitai o avanoa nei ua pei ua lē ano ai mātua e faauma ma totogi pili i taimi ua aiaia e tatau ai a o lei faia suega.
E ulufale loa fanau i le iunivesite ona ave lea i ai o pepa faatumu ma pepa ua iai aiaiga o le totogiina o pili ma aulape e fetaiai ma le tamaitiiti poo le teineitiiti pe a lē totogia pe le mae‘a le pili a o lumanai le suega. Faaalia e le tapaau ua silafia uma e mātua lea tulaga, ma o le taimi umi o le tausaga e tatau ona faatino ai, ae oo ane lava i le suega mulimuli o le tausaga e afea pea le ofisa o le pulega e nisi o mātua mo se talosaga e tuu atu se avanoa ae sue pea a latou fanau. Peitai e manino i le finagalo o le tapaau e lē fetaui ma mātua o loo faamaoni e totogi pili.
O le afea e nisi o mātua o le Palemia ma talosagaina se avanoa e sue ai o latou alo ona ua tapuni ma lē talia e le iunivesite seiloga ua mae‘a pili, na faia ai se feiloaiga i le Aso Faraile ua mavae i le va o le pulega o le iunivesite ma le taitai o le Malo. O le faaiuga o lea feiloaiga ua maua ai se finagalo e toe maua le avanoa o fanau ua lē sue ae o le a toe seti atoa pepa o suega.
Faaalia e le tapaau poo le pule sili o le iunivesite aoao a le atunuu, e faato‘ā mafai lava ona maua le avanoa o fanau e 327 e toe sue ai pe a toe ulufale i le tausaga fou ma totogi mae‘a pili. O le faaiuga o le vaiaso ua mavae na aumai ai se pepa o faamatalaga se finagalo o le malo e tusa ai ma le faaiuga ua taoto ai le mataupu lenei:
“I le mae‘a ai o le feiloaiga a le Kapeneta ma le Fono Sili ma le Pulega o le Iunivesite Aoao o Samoa i le asō, ua taunuu ai i le faaiuga ina ia toe silasila i le toe faatulagaina o suega faapitoa ae lei faaiuina le 2012 mo i latou uma e lei sue i suega faaiu o le tausaga ona o lē na faatamala o mātua i le lē totogiina o pili aoga.
O se tulaga e faafetaia ai e le Alii Palemia le Fono Sili faapea le Alii Polofesa o Leapai Asofou Soo ma le pulega i le tofa fetalai fetuutuunai mo lenei fuafuaga lelei. O le Iunivesite Aoao o Samoa na faavaeina i le 1984 ina ia a‘oa‘oina ma atamamai alo ma fanau o Samoa”.
