Ua foi i Siamani ni fomai se to‘a sefulu o lea atunuu sa malaga i Samoa ona o le fia feiloai i alii ma tamaitai faapea tina ma tamā matutua o loo faia le faiva o le fofo poo taulasea, ma le fiafia ua maua lea avanoa e lē au maua e tufa ai le tomai o taulasea o le atunuu i le faiga o a latou fofo ma vai.
O le fia iloa e fomai Siamani o le faatinoga o le galuega a taulasea le mafuaaga o le feiloaiga na taulamua ai le Pulega o tagata tafafao le Samoa Tourism Authority.
Fai mai le tina o Moli Naea To‘ala, le peresetene o le asosi a taulasea i le atunuu, sa tele vaega na fesiligia ai le latou auaunaga aemaise lava le itu i le talitonuina e tagata e sulu atu mo se faamalologa e ala i ma‘i o le tino.
E pei ona silafia ua mafai ona avatu se taulasea i le falemai e fofo ai se gasegase a o taofia mo togafitiga a fomai i lo tatou atunuu ma o se faiga lea ua tau fai galulue faatasi ai le tomai aoaoina faafomai ma le silafia faataulasea i le togafitia o se gasegase. O le tasi lea o vaega tāua i le fia silafia e fomai Siamani o le faatinoga o galuega a taulasea.
O se tasi o itu o loo liolio i ai taulasea o le lē faailoaina lea i le aumalaga o fomai o laulaau o le vaomatua o loo gaosi ai a latou vai. Faaalia e le peresetene o le asosi, e lē mafai ona ta‘uina ia vaega ona e taua tele i taulasea tapu o le latou galuega o se meaalofa tuu faasolo i totonu o se aiga. Ua foi la fomai mai Siamani ma faamatalaga uma ma le faamoemoe o le a fesootai pea ma le asosi o taulasea mo le saga sailiili pea i auala e togafitia ai se gasegase ona e iai foi itu tāua o le auaunaga ma le tautua o loo faia e taulasea.
O ia tulaga lelei ua oo i ai le asosi o taulasea i lo tatou atunuu, o loo tautaulia pea i nisi o faafitauli o loo feagai ma le asosi.
Faailoa mai e le peresetene o le toatele o nisi o sui ua lē toe oo atu i le faalapotopotoga ae ua ave i ai pepa faamaonia poo ID e iloagofie ai i latou e tagata mo le faia o le galuega.
O loo taumafai le peresetene o toe faafoi atu a latou meatotino.
O popolega o le peresetene ma le asosi ina ne‘i tutupu ni faaletonu i le faiga o le galuega ae tuua‘ia ai le asosi, ae ua lē toe avea ia taulasea ma sui ona ua o ese ma faamaamulu.
E toatasi se taulasea ua faaalia e se sui ua toe faafoi atu ia meatotino ma ua toe fia avea ma sui o le asosi.
