O sē ua fiafia inā pese ia ma vivii ma ia faapea ane, Lo‘u agaga e, ia faamanū atu i le Alii, o mea uma foi o i totonu ia te au ia faamanū i lona Suafa Paia. O le pese o se lagona e puna a‘e mai le loto. E lagona le fia pese ma le leo o pesega ona o le loto ua tumu i le fiafia ma le faafetai. O le auga lava foi o se pese o le faaaliga o le loto faafetai aemaise o le fiafia ona o se faamoemoe ua faataunuuina ma le mata’utia o se mea ua faia e le tagata e ala i le mafutaga ma le Atua.
E tusa ma le lua tausaga na faataatia ma fuafua mai ai le tofa na a‘e ma le finagalo na faaalia e le susuga i le faafeagaiga, le toeaina ia Rev. Leiite Setefano ma lona faletua ia Lealofi Setefano ina ia faatinoina se CD a le aufaipese.
O le Aso Toonai la na faataunuuina ai le tatalaina aloaia o le CD o pesega ma viiga o le Alii a le aufaipese a le Ekalesia PIC Tamaki i Panmure ua faaigoaina “O Laei o le Alii” ua filifilia lenei igoa mo le CD auā foi o le Alii lava ia e ofu i viiga e faavavau.
O le CD e talitonu le susuga i le toeaina ma sa faamalamalama lona manatu e ta‘ua lea o se “Feti‘i o pesega” auā o lea ua feti‘i ai viiga o le Alii i totonu o le CD.
E faataunuu ane lenei faamoemoe o tulai mai le susuga ia Leituala Michael Stephen Ekenasio o le taitaipese alii, ma Uaina Anae Mao Tuuga o le taitaipese tamaitai.
Na saunoa manino le susuga ia Leituala e faamalamalama vaega uma ma na tutulu lava le taitaipese i lana saunoaga auā na ia ta‘ua e lei faigofie le tauasaina mai ona sa iai foi ni vaega sa fai ma faafatuatama‘i o le galuega.
Ae o le loto fiafia ma le agaga faafetai tele i le Atua auā o lea ua tau lau o le faamoemoe ma ua tini pa‘o foi le uto auā o lele ua vaaia ma ua umia nei le CD poo le feti‘i o pesega.
O faiaoga o le susuga ia Talolevavau Livi Obrien ma le susuga ia Line Tuafafo ia ma le au ta laau o Edward Leumaga, Livingston Setefano, Josie Mate, Metita Eli, Lonetona Peato ma Pili Salu.
E 17 pese na pueina ma ua faamauina nei i le CD, o le 9 o pese o loo fofogaina lava e le aufapese, o le 4 o pese o pese fatu ma le isi 4 o pese o loo fofogaina e le fanau ma tama o le aulotu.
O le tatalaina aloaia o le feti‘i o pesega na faataunuuina lava i le malumalu o le Ekalesia PIC Tamaki.
O le susuga lava foi i le toeaina ia Leiite Setefano sa ia taitaiina le saunigalotu na faapaiaina ai le CD, o le faletua o le susuga i le toeaina sa na ootiina le ripine e tatala aloaia ai le CD.
Na mae‘a le sauniga ona oo atu foi lea i le tausiga o le laualo i le taumafataga matagofie na saunia lelei e le aulotu, ma na matuā faamalieina manao o le auvalaaulia aemaise lava o susuga i faafeagaiga ma o latou faletua.
E $14,525.00 le tupe na mafai ona tauaaoina e le aulotu e tusa ma le limafoai ma le aao mafola o le tele o aulotu na auai faatasi ai ma le auvalaaulia. Ia o lea la ua faasalafa atu CD na faimeaalofa ai le aulotu i aulotu uma ma le auvalaaulia na faleoloa masani.
