Ua siitia vaega tupe a Matagaluega a le Malo e faaalu mo alauni ma totogi o sui o Komiti faufautua faaminisita mo le tausaga faaletupe fou o le a amata i le masina fou o Iulai. Ua silia nei i le 500 afe poo le afa miliona vaegatupe ua fuafua mo nisi o komiti.
“Oka se lē alofa o le Malo ma nei mau tupe o le a alu i nei komiti e pau le latou galuega o le fai o faatosina a le HRPP mo le palota o le tausaga fou”, o le finagalo faaalia lea o le sui faipule o le Tautua Samoa Party, Palusalue Faapo II.
“A silasila nisi i nei komiti ua oo i le tai 30 sui auā e ese le komiti i Savaii ese le komiti i Upolu, ae e leai ma ni galuega e faia”.
O le toe polili mai lea o le finagalo o Palusalue ma lana faamatalaga sa sili ona ave nei tupe e tele e totogi ai sui o komiti faufautua a minisita e faaleleia atili ai totogi o tagata faigaluega togiaso a le Malo o loo tigaina i galuega aemaise le lautele o tagata faigaluega a le Malo.
E lei faamalieina le Afioga Palusalue i tali a le Malo na tuuina atu i totonu o le Palemene ina ua ia fesiligia aitalafu i $675 miliona faapea ma vaegatupe o le a alu i alauni ma totogi o sui o komiti faufautua a Minisita o Matagaluega a le Malo, o le mafuaaga lea na ia taloina ai se feiloaiga ma tusitala e saga fofola ai lona finagalo.
Sa toe fesiligia le alii Palemia i se isi faamalamalamaga o nei mataupu na laga e le sui faipule o le Tautua Samoa Party.
“O Palu ua leva o saofai i totonu o le kapeneta a o i totonu o le HRPP, o loo ia silafia lelei lava faiga faavae a lenei faigamalo”.
O le finagalo lea o le alii Palemia ma ia ta‘ua ai sa lē tatau i se tagata e pei o le tasi lea o faipule o Safata ona ia toe fesiligia mea nei auā ua na silafia lelei, ae foliga mai e pei ona saunoa Tuilaepa, o le taimi atoa o le sui sa iai i totonu o le kapeneta e lē malamalama i se mea e tasi, ma o lona uiga sa na o le tali lava o le faamanuiaga o totogi sa avea ai o ia ma minisita o le Malo.
“E tāua tele komiti auā o loo fai ma feiloai ma le Malo ma aumai ai fautuaga i mea e tatau ona fai mo le manuia o tagata uma aemaise o loo maua ai e le Malo mai toeaiina tuualalo tāua ma aogā”.
Ua teena e le Palemia le faaaogā o sui o komiti e faia ni faatosina a le HRPP.
“Ou te tau masalosalo o le mea leaga lena a Palu sa fai i sui o lana komiti a o avea ma minisita”, na tali mai ai Tuilaepa.
O le taimi nei o loo iai sui o le itumalo o Safata i ia komiti e pei ona faaalia e le Ppalemia. O sui foi ia sa iai i le taimi a o avea le sui faipule o le Tautua Samoa ma minisita.
O le mea mautinoa ua vevela faatosina ma talaiga faapolokiki a vaega faaupufai ma faipule auā o le tausaga fou le palota tele.
