Ua mae‘a nei ona faia ni faaiuga a le Malo mo nisi o tofiga o ofisa o le Malo o Samoa i atunuu i fafo ma o le fonotaga a le Kapeneta i le vaiaso na tea nei na faamaonia ai ia tofiga fou.
Ua faailoa mai e le ofisa sili o le Matagaluega a le Palemia o ia foi o le failautusi a le kapeneta le faletua o Vaosa Epa, o le afioga Leasi Papalii Tommy Scanlan, ua filifilia e avea ma Hai-Komesina fou o Samoa i Niu Sila e faamautu i Ueligitone.
O le a sui tulaga o ia i le afioga i le Aoee, Asi Tuiataga James Blakelock, ua mae‘a lona taimi sa ia tauaveina ai lea tofiga.
Ua faamaonia foi e le Kapeneta i sana faaiuga i le vaiaso na tea nei le toe filifilia o le susuga Faolotoi Reupena Pogi, e faaauau pea ona ia tauave le tofiga Konesula o Samoa i Aukilani mo le isi tolu tausaga.
O le tofiga komesina o fefaatauaiga i Niu Sila ua filifilia nei i ai le afioga Fonoti Iupati Fuatai o loo taiulu iai aoaoga o le gagana Samoa ma le aganuu i le Iunivesite aoao a Samoa i Le Papaigalagala.
O le a sui tulaga o ia i le susuga Dr Pa‘o Luteru sa seei i le nofoa o le Komesina o Fefaatauaiga lea ua toe filifilia i se isi galuega, o le avea lea ma sui o Samoa i Europa e faamautu i le atunuu o Peleseuma.
O le afioga Tuala Farani Chang Tung, sa ia tauaveina lea tofiga ua mae‘a lona taimi galue.
O le taimi ua feagai le matagaluega o le va i fafo ma le faia o feutanaiga ma malo i fafo mo le faailoa i ai o tofiga ua faia, ona faato‘ā tuua lea e i latou o loo seei i ia tofiga atunuu o loo galulue ai.
