Ua iai nei se fesootaiga i le va o tagata na aafia i faalavelave faalenatura i Niu Ioka i Amerika faapea ai Samoa nei. O lea fesootaiga ua faaauala mai i le Mataaga a Samoa lea na faalauiloa ai ata o nofoaga na aafia i nei faalavelave matautia.
Ua lē gata la i lea itu, ae ua faapea foi ona iai se fesootaiga o le a mafai ai ona talanoa tagata i Samoa nei ma tagata o le aai o Niu Ioka e faatatau i aafiaga o o latou aiga, o meatotino ma le siosiomaga ona o suiga ogaoga o le tau ma le tulai mai ai o nei faalavelave matautia.
E $43,000 tala Amerika le tupe ua aumai e le Malo o Amerika i lenei polokalame ma ua faamauina ai le tulaga ua iai atunuu eseese o le lalolagi e ui i le faitau afe o maila ua va ai.
E 11 lelei polokalame faapea ua aofia ai fesootaiga nei ma le faamoemoe ina ia mafai ona faatautaia le aoina o faamaumauga ma faamatalaga e iloa ai aafiaga o lea itu ma lea itu o le lalolagi.
O se tasi o vaega tāua o suiga o le siosiomaga o le a talanoaina i le va o tagata i Samoa nei atoa ai ma Amerika, o le itu lea o fale e tatau ona fausia mo le tali atu i suiga o le tau e pei o afā fulifao, mafuie ma galulolo.
O le tamaitai o loo vaaia le Mataaga o Talaaga faanatura i Niu Ioka, na malaga mai lava i Samoa e faalauiloa lenei polokalame.
Sa ia ave le faatāua i fausaga o fale e pei ona talanoaina i lenei polokalame, o auala e mafai ona talanoa ai i latou na aafia i le afā o Sandy i Niu Ioka ma le afā o Eveni i Samoa i ituaiga fale e faalauiloa ai atunuu e lua ae e mafai ona tali atu i suiga ogaoga o le tau.
O le fale Samoa ua toatele i latou i fafo ua fia iloa le fausaga aemaise o suiga e mafai ona ave i ai e tatali ai afā, tatali ai lologa ma tatali ai mafuie.
O le a faapena ona faasoa mai ai foi le tulaga o iai fausaga i Niu Ioka latou, ma o ni fautuaga ua faaalia atonu e iai foi se aogā i Samoa nei i le agai i luma auā o le toatele lava e lē o toe nonofo i ni fale Samoa ae ua agai i fale papalagi mo le faamautu ai o aiga.
