Fesootai Niu Sila, Samoa ma Tonga i soligatulafono

Sa iai ni faasilasilaga na faalauiloa i lenei vaiaso e faatatau ia i latou ua saili ona o solitulafono ua masalomia ai. O le fesootaiga i le va o leoleo ma ofisamalaga a Niu Sila, Samoa nei atoa ai Tonga ua molimauina le faamalosia ona o lea tulaga.

O le faasilasilaga muamua, ua faalauiloa ai e le Ofisa o le Loia Sili i Samoa nei le toe faafoi i Niu Sila o se alii ua leva ona saili mai e Niu Sila ona o ni solitulafono e ono oo atu i le 20 tausaga se faasalaga faafalepuipui e ave i ai pe a faamaonia.

O le lipoti mai i Niu Sila, o le aso 13 o Oketopa i le tausaga e 2005 na faamautu ai tusi saisai o lenei alii ma e oo mai i le taimi lenei o loo faamalosia pea ia tusi saisai.

Na iloa ane e Niu Sila ua toe foi i Samoa lea alii e suafa ia Fatu Seti. O le aso 21 o le masina o Tesema o le tausaga na tea nei na maua ai e le Minisita o Faamasinoga, le Afioga Fiame Naomi Mataafa se talosaga mai i le Malo o Niu Sila e faafoi atu ai i Niu Sila Fatu Seti.

O le faaiuga la o Ianuari lea na tuu atu ai loa e le Minisita le faatagaga i le ofisa o le Loia Sili ina ia faaauau loa galuega auā le toe faafoi ai o lenei alii, e aofia ai se talosaga na ave e le Loia Sili i le Faamasinoga Faaitumalo mo se tusi saisai o Seti.

Sa tulai lenei alii i luma o le afioga i le Faamasino ia Vaepule Vaemoa Vaai ma taofia ai loa i le amataga o Fepuari e faatali ai le toe faafoi i Niu Sila e pei ona molimauina i le faaiuga o le vaiaso na tea nei, ma o loo ta‘ua atu i se tasi foi o lipoti o lenei lomiga.

Faaalia e lipoti e lei teena e lenei alii le taofia e leoleo ma le avatu ai i Niu Sila ma o leoleo mai i Niu Sila ia na malaga faatasi ma lenei alii auā le tali ai i moliaga ua faia faasaga ia te ia.

O lea la ua mae‘a lea sailiga, ae e tusa ma le to‘a 40 ni tagatānuu o Tonga ia ua saili nei e le ofisamalaga o Niu Sila ona o se fesootaiga ma le ofisa o leoleo a Tonga i tagata solitulafono o loo masalomia le sosola i Niu Sila ma faamautu ai.

Faaalia e le Minisita o Femalagaaiga a Niu Sila o Michael Woodhouse, e tele le popolega o lona atunuu i lea tulaga ma ua ia faatonuina le ave o le faamuamua i le ofisa o femalagaaiga ina ia saili mai tagatānuu nei ua masalomia le sulu atu i Niu Sila ma alofia ai le tulai i le faamasinoga i Tonga e tali i moliaga faasaga ia i latou pe ua mae‘a foi ona faamaonia a latou solitulafono ae sa tatala lava le malaga ese ma Tonga.

O nisi o nei tagata ua ta‘ua e le Ofisa o Femalagaaiga ua nofomau i Niu Sila. Ua galulue faatasi nei leoleo a le Malo o Tonga ma le ofisamalaga a Niu Sila mo lenei sailiga.

O le popolega ua ta‘ua e le Minisita o Femalagaaiga a Niu Sila ona o le sao atu o le toatele o nei tagata i Niu Sila ona e lē o faamaoni lipoti a leoleo o loo avatu ina ia mafai ai ona malaga nisi o loo talosaga mo avanoa e ulufale ai i Niu Sila ma ua manino ai le pepelo o lipoti nei a leoleo ona e tatau ona faalauiloa ai soligatulafono a i latou nei ua maua le malaga atu ma faamautu i Niu Sila.

Ua faamalosia nei foi la e le Ofisa o Femalagaaiga a Niu Sila le siaki lelei ma le mautu o faamaoniga o lipoti a leoleo i soo se talosaga o pemita ulufale mai i Tonga.