O le agaga fia fefaasoaa‘i ma ia saga a‘oa‘o atili le tomai i tu ma aganuu faa-Samoa, i se auala e ono faaofi ai le faamāmā avega, o le tasi lea o mafuaaga autū na masii mai ai le vasega o faiaoga, alii ma tamaitai aoga o le Iunivesite o Le Amo Sa o Savavau o Tutuila ma Manua, lea na talimalo ai le Taitaifono ma le Komiti o le Faa Faleula a Samoa i le faaiuga o le vaiaso talu ai.
“O le faamoemoe maualuga lava ia faaaogā tatau lenei avanoa e fetufaa‘i ai ma le auuso i Upolu nei i auala e saili ai se faamāmā avega i tu ma aga i fanua a si o tatou atunuu.”
“E maualuga tele la matou vaavaai mai i nai uso i Samoa Tutoatasi nei i le tulaga o le iloa ma le silafia o le tatou aganuu, o le ala foi lea ua lagona tele ai le fiafia i lenei mafutaga.
O le faamoemoe maualuga ia mae‘a lenei feiloaiga ma tamalii ma failauga o le Komiti a le Faa Faleula, ua lava se matou fefaasoaaiga, i ni auala talafeagai e saili ai se faamāmā avega i tu ma aga i fanua a si o tatou atunuu.
E eseese lava i igoa ua lauiloa ai i le Pasefika ma le lalolagi, a o le sootaga tau toto ivi ma aano e lē mafai ona tuu eseeseina ai i tatou. Ou te talitonu a a‘u ia, e tasi a lo ta fala tasi foi lo ta aluga.” O le saunoaga lea a le Resitala o le Iunivesite le Afioga Muagututia John.
E lata i le to‘a 20 le aumalaga na asiasi mai. Ua lata i le 5 tausaga talu ona faavae le Iunivesite i laufanua o Amerika Samoa. E to‘a 80 sui na amataina ma e oo mai i le taimi nei ua silia i le toa selau ona sui auai, ma o le toatele lava o alii ma tamaitai aoga, e aofia ai faiaoga, fomai, faifeau ma loia, ae leai se tapulaa o i latou e fia auai, e tatala le avanoa i soo se tagata.
O loo ave foi le latou faamuamua i le mamalu o tamalii e lei leva ona faapaleina i suafa matai o o latou aiga, ina ia faaaogā le avanoa.
O le Iunivesite o Le Amo Sa o Savavau Tutuila ma Manua, e fanau ma i le Sosaiete Faatina le Society of Indgenious Education American Samoa. (SIEAS).
O se a‘oa‘oga lelei na maua mai nisi o tamalii e pei o le Tofa Maulolo Leaula Tavita Amosa, lea na a‘e ai loa se tofa ma amataina le aoga.
O le masina o Aukuso na se‘i mavae atu nei na faia ai le uluai faauuga o alii ma tamaitai ua mae‘a ma faamanuiaina i tusipasi ma tipiloma i mataupu e pei o le BA Tagata Malaga, Faa Tufugaga, ma le MA Matua o Faiva.
“O le matou foi la galuega o loo taumafai i si o matou motu i Sasa‘e, o le fia faalauiloa lea i tagatanuu ina ia o latou nofo silafia i soo se auala e maua ai se faamāmā avega i le soifuaga o aso uma ma faalavelave fai i totonu o aiga, atunuu, aemaise o ekalesia.
O le ala foi lea o le savalivali mai se‘i saili le tofa ma le uta mai nai uso i Upolu nei.” O le saunoaga lea a le Taitaifono le Afioga Aeoainuu Aleki.
O le tausaga talu ai na asiasi mai ai mo le uluai taimi. O le malaga mai la i lenei tausaga na maua ai foi le avanoa e asiasi atu i nisi o nofoaga o loo iai mataaga o le vavau i Upolu nei e pei o le Ana o le To Sua i le afioaga o Vavau.
Na ta‘ua e le Pule Sili Lagolago o le Matagaluega o Tina ma Tamaitai Atinae o Nuu ma Agafesootai i le Vaega o le Lotoifale, le Tofa Maulolo Leaula Tavita, o le sui sooupu foi lea i itu e lua, o se feiloaiga tāua tele lenei.
E lē gata ua mafai ona fefaasoaai silafia o tamalii ma failauga o le Faleagafulu ma le Manuatele ma sui o le Faa Faleula Samoa, ae ua avea foi lenei avanoa e tufa mai ai i lo latou foi iloa i la latou galuega o loo feagai ai i le motu i Sasa‘e.
“E lei faigofie foi lenei galuega. O le tau faavaeina o le aoga mai lona amataga. E lē gata o le oge i faiaoga, ae faapea foi le tau faalauiloa i le mamalu o le atunuu i le motu i Sasa‘e le auga o le feau o loo taumafai e fia auina atu, auā se lumanai manuia o tupulaga au i luma, ia aemaise lava pe a oo le taimi e pale mai ai i suafa matai ma ofi atu ai i faiga faaiuga i totonu o saofaiga ma faafaletui a alii ma faipule i nuu taitasi.
E oo a i se nofoaga tumau e lei faigofie ona maua e oo mai lava i lea aso.”
O le finagalo faaalia lea o se tasi o tamaitai aoga le faletua ia Siaa Alama.
Na toe taliu le uto i Amerika Samoa i le amataga o le vaiaso nei. Ta‘ua e le Taitaifono o le Faa Faleula a Samoa le Afioga Teo Eteuati Sagala, o le a se‘i tālia uto a maunu pe ono a‘e se tofa e ono faaauau ai le latou faiga paaga ma le Iunivesite O le Amo Sa o Savavau Tutuila ma Manua i se taimi o i luma.
O le ‘ava o le feiloaiga na faia i le afolau talimalo o le Fale Talimalo o le Samoan Holidays i Tanumapua, ma na tapenaina e le vaega o le Lotoifale i le Matagaluega o Tina ma Tamaitai Atina‘e o Nuu ma Agafesootai.
O le ‘ava o le feiloaiga e ui ua molimauina soo i le soifua o tagata Samoa ae o lona faatinoga ma le aogā i le va nonofo ai o tagata Samoa ua ave i ai le faatāua i lenei vaega o le a‘oa‘oga mo le tikeri o tu ma aga faa-Samoa i le Iunivesite ma o le mafuaaga lea o le tāua o lea feiloaiga i le faaiuga o le vaiaso.
O le Iunivesite o Amo Sa o Sa Vavau i Samoa nei o loo faatautaia e le Afioga Aiono Dr Fanaafi Le Tagaloa ma le afioga Le Tagaloa Dr Pita Pola, ma o lona lālā lea ua a‘oa‘oina ai mataupu uma i le Gagana Samoa.