O se tasi lenei o faama‘i ua alualu i luma le toatele o le mamalu o tagata lautele i Ausetalia e maliliu ai, aemaise lava o Tuaa Sinasina poo soifua ua matutua, o le Aso Toonai na tea nei na faatāua ai e nisi o faalapotopotoga i Melepone le sailiga fofō e ono tuuitiitia pe foia ai lenei faama‘i pipisi.
E tele iunivesite ma fomai faapitoa o loo tau sailia pea auala ma togafitiga faasaienitisi faafomai mo le faama‘i, ma o le ala foi lea o suega seleni pei ona faataunuuina i le Aso Toonai aso 22 o Setema, ina ia faatupeina ai pea ma lagolago i suesuega mo se fofō.
O se tasi o nofoaga na faataunuu a latou sailiga seleni, o le nofoaga mo tagata matutua i le pitonuu o Sunshine, lea o loo tautua ma faigaluega ai nisi o le mamalu o Samoa, ma na faalautele lo latou aao mafola e ala i le valaulia o se tasi o autalavou Samoa e faafiafia mo le aso, na aofia ia latou faafiafiaga ni pesepesega ma siva, na molimau se tasi o tina Samoa o faigaluega i lenei nofoaga.
O ia foi o se sui o le Ekalesia e ana le autalavou na faafiafia, e lē o se taimi muamua lea ua fai ai se sao o la latou autalavou i aso faapenei a lo latou fale, ua sosoo nei tausaga e tolu pe fa, o fai lava la latou autalavou ma sui faafiafia mai lo tatou atunuu o Samoa mo mea fai a si o latou fale mo tagata matutua.
O nisi o tausaga o pesepesega o le Kirisimasi, o le tausaga talu ai o le aso o aganuu eseese, ae o lea foi ua toe fai ma lenei sao i lenei tausaga.
