Fesoasoani Seiuli Pesa Ilimaleota i Brisbane mo le sunami i Samoa

O loo faagasolo pea foai ma le valevalealofa o le mamalu o Samoa i atunuu i fafo mo nai o tatou tagata sa mafatia i Samoa, e oo foi i alo pepese lauiloa i Aukilani e pei ona fai sao ai i ni nai vaiaso ua tuanai.
E faapea foi se lagona na tupu ae i le finagalo o se tasi o alo tautaua o Samoa i le musika o loo alaala i Kuiniselani, le susuga ia Seiuli Pesa Ilimaleota mai le alalafaga o Amaile ma Samusu i Aleipata.
Ua toe o se aga ona mae‘a lea o le tapenaina o faamomoli a Kuiniselani lava ia o loo pisi ai le Komiti Faafoe aemaise le seleni o loo faamaopoopoina sa gapatia i ai le mamalu o Samoa i lenei foi itu, lea ua faamoemoe o le a tuuvaa atu i le faaiuga o Novema.
Na a’e se tofa i lea alo o le atunuu e fia foi sona sao e ala i lana konesti sa faia i le hall lava lea sa faafiafia ai Pagamalie Iopu ma Laumata, le Burrow State School i Marsten Brisbane. E $20 le ulufale ae alu ese le $5 i le komiti faatasi ai ma seleni sa lafoina i le vii o le sunami sa lagiina e le susuga ia Seiuli; sa alu uma lea vaega tupe aua le fesoasoani i le seleni e auina atu i Samoa.
Ua ova atu i le $80 afe tala Ausetalia le seleni o loo faamaopoopoina nei ae le o mafai ona uma ai le aao foai o soo se faalapotopotoga, ekalesia, ma tagata taitoatasi e ui lava ina fau ma soloi meaalofa ua auina atu e nisi atunuu mo Samoa.
O lea po sa molimauina le lagolago mai o le atunuu, e tele se seleni sa tauaaoina, aua sa lei mafai ona muta le siva Samoa, e lei masepu foi fofoga o le MC, le susuga ia Faimalo Faleiva Tau i ia foi vaega uma.
Ua fai foi si leva e lei toe silasila nisi o le mamalu o le atunuu i le susuga ia Seiuli Pesa Ilimaleota, o le ala lea na muliga foi le umi o le kiu o le vaa e alu i Savaii i le umi o le laina e agai atu i totonu o le Burrow State School i le fia maimoa ma faafofoga i le siufofoga malie o lenei foi alo lauiloa o Samoa i le musika, aemaise le uluai vii o le sunami sa tulimatai i ai Kuiniselani lea sa lagiina lava e le susuga ia Seiuli Pesa Ilimaleota. E manatua ai pea si toeaina o Petelo i ana faleaitu “Ai ana faapea uma se tumu o se lotu semanu e ave olaina uma”. Ae o le lagona faafetai sili o le susuga ia Seiuli Pesa ona o le talisapaia e le mamalu o Samoa o lana faafiafiaga e ala i le faatalauula atu, ua a’e manuia ai ona faiva i lea po.
O le susuga ia Wally Iose Tuapola ma lana falepuepese, sa pueina ai le CD faatasi ai ma le susuga ia Faamanu Vaelei Lefua, o ia lea sa nafa ma le tipiina o le CD ma faia le kava o lea CD o le sunami. O le susuga ia Seiuli Pesa Ilimaleota, o si ona faletua o Luisa Vaelei Lefua mai le alalafaga o Matautu Apia ma Sataua i Savaii.
O lea lava faamoemoe sa maualuga ma mamalu aua sa mafai ona auai atu ai le susuga i le faafeagaiga ia Tino Scanlan, o le faafeagaiga taulagi lea a Seiuli Pesa Ilimaleota o le ekalesia Uniting Church, faatasi ai ma le susuga ia Tauiliili Jeff Faatoafe, o le sooupu a le mafutaga a le Logan Samoa Advisory Council Inc i Logan.