O fesoasoani e maua fua i le alofa tulai ma le agalelei o isi tagata ma faalapotopotoga poo se faigamalo foi, e tasi lava le faamatalaga e fai ei latou e talia o le faafetai aua e lei alu ai se malosi e saili.
O le tiute foi o i latou e tauaaoina ni fesoasoani maua fua o le vaavaai lelei ma ia tuusa‘o lava fesoasoani i le autū na mafua ai ona maua lea agalelei.
O le faafetai a le faalapotopotoga o le Toomaga mo e Puapuagatia i se tasi o alo o le atunuu ma lona aiga le susuga Rodney Sooialo ma le Spinning Tops i NZ na latou tuufaatasia se pusaoloa poo se container o oloa faufale ua latou faamealofa mo le faalapotopotoga e toe fausia ai se tasi o nofoaga o loo faamautu ai fanau ua sauaina, e ese mai le nofoaga fou na tatala talu ai nei lea ua siitia i ai fanau mai le pepe e oo i le 12 tausaga le matutua.
Faaalia e le Pelesetene o le Toomaga le faletua o Lina Chang, o le tiute tauave lea o le faalapotopotoga o le ofoina o le tausiga atoa mo nei fanau mai lava i fale e tausia ai, o taumafa ma lavalava, ave i le falemai ma le aoga ma le vaaiga o aso uma.
Na teena e le pelesetene ua tuulafoai nei fanau e o latou aiga ma le tuu atu atoa o le vaaiga ia i latou e aunoa ma se latou fesoasoani. Faaalia e Lina o le faatupega atoa o le vaaia o fanau ma fale o loo palasi lava lea i le tau‘au o le Toomaga mo e Puapuagatia, ma o le faafetai lava e faifai pea ona poo ai ea i latou ua sasaa atu ai pea lea agalelei.
O le savali a le faalapotopotoga sa alu i Niu Sila i se taimi o le tausaga nei na faailoa ane ai le faamoemoe o le susuga Rodney Sooialo ma lona aiga e fia faia se latou foai.
O pusaoloa tetele ua aumai ai oloa faifale ma isi totoga ua amata nei ona faaaogā mo le toe fausia ia lelei o se tasi o apitaga mo fanau ua sauāina o loo vaaia e le Toomaga mo e Puapuagatia.
O le nofoaga lea na muai faamautu ai fanau ia, a o lei fausia le nofoaga i Tuanaimato lea na tatala i le masina na tea nei ma o loo faamautu ma vaai ai fanau mai le pepe e oo i le 12 tausaga le matutua.
O le nofoaga i Motootua ua faaleleia mo le faamautu ai o fanau e 12 tausaga agai i luga ona na faaalia e le pelesetene, e lē tatau ona tuu faatasi fanau laiti ma le vaega ua faasolo ina matutua.
E 40 tamaiti o loo tausia e le Toomaga i le taimi nei ma o le faamatalaga a le Pelesetene, e lē faigofie auā o tupe e faalagolago i ai i aso uma auā tusa lava o ia fanau o loo tausia e o latou mātua ma aiga i mea e mananao ai i taumafa, lavalava, le vaai o le fomai pe a mama‘i, faapea le ave i le a‘oga poo isi lava manaoga o fanau.
