O loo tapenapena le Malo o Samoa i le faatuina o se pulega e nafa ma le pulea o galuega i totonu o falepuipui i le atunuu, aemaise falepuipui e lua o le isi i Tafaigata i Upolu a o le isi i Vaiaata i Savaii.
Talu mai le masina o Me o le tausaga ua mavae na faia ai le uluai aoaoga mo leoleo o le falepuipui i Samoa sa faatautaia e leoleo o le falepuipui e toalua mai Niu Sila, o le amataga o lenei tausaga ua toe faaauau ai lea aoaoga.
O le alii e faufautua mo aoaoga i galuega i falepuipui i lea atunuu o Steve Dunnington ma se tasi alii ofisa o Brenden Makinson o loo feagai ma lea aoaoga e pei ona fesoasoani ai ma se alii leoleo falepuipui mai Niu Sila le susuga Alisi Tupailelei. E to‘a 25 leoleo falepuipui o le atunuu sa auai i le aoaoga ma o le faamatalaga a le alii o Steve, ua lava taoso i latou na agai iai le faamoemoe mo le faatautaia o galuega pe a faatuina le pulega fou o falepuipui a Samoa, lea o le a aveesea ai mai le vaaiga ma le pulega a le Matagaluega o Leoleo.
O se suiga o le a lē toe tauaveina ai e leoleo le vaaia o pagota e pei ona faia i Niu Sila ma isi atunuu. O se tasi lea o suiga ua leva tausaga o silasila i ai le matagaluega o leoleo ma falepuipui, ina ia aveese le pulega o falepuipui, peitai o le tausaga na tea nei na pasia ai e le Palemene se tulafono tau faaofi mo le faatuina o lea itutino fou o le Malo. Ua faaalia e alii ofisa mai le pulega o falepuipui a Niu Sila le naunau pea e ofo mai le latou fesoasoani mo le aoaoina o leoleo falepuipui i Samoa, ina ia mafai ona ausia ai le manaoga o loo iai, ia lelei ona faatino o latou tiute i le vaaia o tagata nofo sala.
O se tasi lea o galuega o loo toatele tagata Samoa na manuia i le se‘i poo le nofomau i Niu Sila i tausaga ua mavae o loo galulue ai. O le tausaga na tea nei na faailoa mai ai foi i ni lipoti le maua e nisi o tamafanau a Samoa ni faailoga lelei ua amanaia ai le latou tautua i lea galuega i totonu o Niu Sila. O le talitonuga o le isi lea galuega i Samoa o le a faigofie ona maua ai avanoa mo nisi e galulue ai i totonu o Niu Sila pe afai e alualu ae fia malaga e nonofo mau i lea atunuu.
Ua mae‘a ona sainia se maliega i le va o le Matagaluega o leoleo ma falepuipui a Samoa ma le pulega o falepuipui a Niu Sila faapea le vaega o galuega tau tulafono a Samoa le Law and Justice sector mo le faatinoina e le pulega o falepuipui a Niu Sila o aoaoga mo i latou o le a galulue i le pulega fou o falepuipui a Samoa.
