Ua toe foi i lenei vaiaso i Melepone Ausetalia se aoga Katoliko i lea itu o lea atunuu e fai ma a latou galuega i tausaga uma le saili tupe ma aumai fesoasoani i nisi o aoga a le Ekalesia Katoliko i Samoa atoa ai ma le aoga mo fanau e iai manaoga faapitoa o le mafaufau, le Fia Malamalama i Alafua.
O le fanau e tusa ma le to‘a 30 oloo aoaoina ile Fia Malamalama e amata mai lava ile matutua o le tailima tausaga seia oo ile 13 ona agai loa lea o le isi fanau i vasega matutua e saili ai galuega ile ta‘i 14 tausaga agai i luga.
O le kolisi lenei i Ausetalia e ta‘ua o le Bendigo Catholic College e amata mai foi ile fanau i aoga laiti e oo lava ile maualuga o Kolisi.
E filifili lelei lava i latou e agai mai i Samoa i lea tausaga ma lea tausaga e pei ona ta‘ua e le tamaitai faiaoga e aumaia le fanau ia Tricia Schofield, e fai lelei lava faatalatalanoaga o tama ma teine aoga ile mafuaaga e fia malaga mai ai i Samoa auā o le polokalame lenei e unai ai tu ma aga a tagata Kerisiano ma le tāua o le limafoai.
O i latou e filifilia, na ta‘ua e le faiaoga e 10 lelei vaiaso e saili tupe ai ma e fesootai mai lava puleaoga o aoga nei e aofia ai le Fia Malamalama ina ia mafai ona ta‘u sa‘o atu meaaoga moomia i lea tausaga ma lea tausaga.
O le aoga la o le Fia Malamalama o vali, pulumu e faaaogā e fanau matutua mo a latou galuega taulima, faapea ai meataalo a le fanau laiti ma meafaigaluega auā le umukuka i le gasesega lea o taumafa ma le togalaau o fualaau faisua, ia ua faatino e fanau na agai iai le talosaga. Ta‘ua e Sharon Suhren le pule o le Aoga o le Fia Malamalama, o le fesoasoani e faatupe ai galuega a le aoga e sau lava ile komiti o mātua ma faiaoga le PTA ma e iai le fesoasoani e maua mai ile Malo e faatasi ile tausaga, ma e tele lava ina agai ile faatinoga o aoga a le fanau laiti, peitai o le fanau matutua ia ua unai mo galuega, o iina la lea e fai lava si telē o le manaoga mo a latou meafaigaluega.
E toalua alo mai le Fia Malamalama faatoa mae‘a ona faatino vaiaso na galulue faataitai ai ile Yazaki Samoa i Vaitele, ma ua tatala le avanoa e toe agai atu ai pe afai o iai se manaoga lea i galuega ile lumanai, ma ose fiafiaga tele lea mo le aoga i Alafua ona o lea lava ua amata ona agai ane galuega e avatu fanau mo avanoa nei, ae mo nisi ua agai ane lava ile aoga e faatau meataulima ma tofo foi taumafa ua gasese ele fanau e pei ona faalauiloa ele fanau ia i latou mai i Bendigo i Melepone i Ausetalia.
Na tele foi meataulima Samoa na toe faatau lava ele fanau mai i Ausetalia ina ua mae‘a ona faataitai le faalifufa‘i ma le lu‘au tunu na saunia e le fanau ae salani ile laumoli.
Ua ono tausaga o le mafutaga lenei ma na ta‘ua e le faiaoga ia Schofield, e lē na o le Fia Malamalama o faamanuiaina i lenei fesootaiga, ae o le telē ia o le aogā o le aumai o le fanau e vaavaai tonu i fanau o alu iai lo latou ma‘au aemaise o le fesootai ma i latou ia.
