E pei ona auina atu i le vaiaso na tea nei o le tumutumu o nofoaga faitele e pei o le Maketi o fefaatauaiga i Fugalei, ua matuā vaaia ai le matautia o le faaopoopo o le otaota lafoai i ia nofoaga.
Ae e pei ona vaaia i le tele o itu o le talafatai o Apia, ua lē na o le maketi ua faaputu ai le otaota ae ua vaaia i alavai ia e totogi e le Malo konekarate latou te faamamāina.
Ua vaaia le lafoai i nofoaga e lē o iai ni fale e pei o uta atu o le Malaevaalele i Fagalii aemaise o le faagasolo lava o le tele o le lapisi i nofoaga e lafoai ai e pei o Tafaigata ma Vaiaata i Savaii.
Ua faaalia e le Alii Ofisa Sili o le Matagaluega o Punaoa faale-Natura ma le Siosiomaga, Taulealeausumai Laavasa Malua ua faamautu mai i lenei vaiaso se isi fesoasoani faaopoopo a le Malo o Iapani ina ia faaauau ai ona ao ma faalelei nofoaga o loo lafoai ai le otaota.
E fesoasoani foi i le tau tuuitiitia o le lafoai o otaota i itu eseese o le atunuu. E mitamita Samoa i ona laufanua lanulauava ma le mamā – o nisi ia o vaega e unai i le faatosina mai ai o tagata tafafao mai i lo tatou atunuu, peitai, ua lē o le tulaga lea ua iai le faatuputupulaia o le lapisi ma e talu mai le tausaga e 2000, o le Malo o Iapani lea ua matuā malosi lana unai ina ia avea Samoa ma faataitaiga maualuga i lenei itulagi o le Pasefika i auala ua faia ina ia mautinoa ai le maua o le soifua maloloina mai i otaota lafoai.
O lea atina‘e tele na faatuina i Tafaigata ua faamautu ai nofoaga e vaevae i ai le lapisi ma ua manino foi i latou ua feagai ma le vaaiga o ia nofoaga i le vaevaega lea.
O le popolega tele o nofoaga faitele nei ua lafoai ai le otaota ma e ui o loo totogi konekarate latou te faamamāina o timuga o le vaiaso na se‘i mavae atu nei na vaaia ai loa le tulaga faaletonu o alavai ia e feta‘ia‘i solo i Fugalei ma ua oo lava i lumafale o nisi aiga o loo tu auala ma autafa o alavai le otaota o loo tafefea atu i ia alavai.
O le otaota o loo lafoai i maketi ua vaaia le malosi o le galulue a le Vaega o Taui o Faalavelave Faafuasei lea e vaaia le maketi ina ia faamamā ia nofoaga – ua tailua i le aso ma agai mai alii faigaluega a le Faalapotopotoga auā le aoina o le otaota ma ua iai foi fautuaga ua ave i le anoano o loo faatau oloa ma meamata i nei maketi aemaise o faleaiga ina ia alolofa e tuu pepa nei otaota.
O se fautuaga e matuā faigata tele ona usitaia e le toatele ia na o le feoai lava ma ipu kofe, ipu saimini, o pepa panikeke ma isi taumafa ma lafoai solo i nofoaga faatali pasi.
O tagata faigaluega lava la a le ACC ia e tigaina e tau faamamā ia nofoaga. Faaalia e Taulealeausumai Laavasa, e lē o mafai ona faailoa mai le faaopoopoga o le fesoasoani lenei a le Malo o Iapani ae o lea ua toe saini Iapani e faaauau le latou atina‘e lenei i Samoa ma isi atumotu o le Pasefika ma e tatau lava ona feiloai atumotu ma iloa ai le vaevaega o lea fesoasoani tau tupe o le a alu i le faaleleia atili o nofoaga nei e lafoai ai le otaota.
Faaalia foi e le alii Pule ua iai nei se fuafuaga ina ia aoina ni faamaumauga poo le ā tonu le maualuga ua faaopoopo i ai le otaota lafoai ae o ā foi auala e mafai e le Matagaluega o Punaoa faale-Natura ma le Siosiomaga ona galulue taula‘i i ai mo le faaitiitia o le otaota lafoai.
