O loo i Samoa se vaega o le Iunivesite faavaomalo a Niu Sila ma Ausetalia ua patino tonu i tomai tau fomai tipitipi.
O lenei malaga ua faia ona o le manaoga e lava sauni i latou o loo a‘oa‘oina i le Iunivesite faafomai a le Oceania lea e i Motootua.
O lea polokalame a le Iunivesite faafomai a Ausetalia faapea ai ma Niu Sila, ua auai mai ai fomai o loo iai le tomai faapitoa lea mo taotoga o soo se tasi.
E to‘a 15 le aumalaga ma ua lē gata ina faaleleia atili ai le tomai i le faatinoga o taotoga ae mo i latou o loo aooga i Motootua, o se avanoa lea ua manino mai ai foi e lē na o le tomai tau fomai tipitipi e tatau ona sauni i ai i latou, ae o le tomai ina ia mafai ona faatalatalanoa ma sailiili aafiaga o le mafaufau o soo se tasi e feagai ma faigata o le tino. O le toatele lava ua maua i gasegase o le tino, ua faaalia e se pepa faalauiloa e faatatau i lea a‘oa‘oga, ua tele atu le aafiaga ona ua aafia sa‘o ai foi ma le mafaufau i ia manu‘aga.
O le a‘oa‘oga la lenei ua mafai ai ona fesiligia e i latou o loo aooga nisi o auala e mafai ona fesoasoani ai fomai tipitipi nei ia i latou o loo feagai ma nei mafatiaga ma ia faamāmā ai le fefe o nisi i taotoga ae e sologa lelei ai foi le faatinoga o le tautua faafomai lava latou, ae ese ai tautua mo le faaleleia o le mafaufau.
O se tasi lenei o taumafaiga ua vaaia le faatino i Samoa i lenei lua vaiaso ua faamanatu faatasi ai ma le atoa o le tausaga talu ona afatia Samoa i le sunami o le tausaga na tea nei. O le tele o polokalame ua faatautaia ua fai agai i le autū lea o le saogalemu o le soifua, o le lava o le nofo sauniuni, o le vaavaai foi i auala e mafai ona tali atu ai auaunaga e pei o fomai i le tulai mai ai o faalavelave tetele e pei o le sunami.
O le Iunivesite o a‘oa‘oga faafomai a Niu Sila ma Ausetalia, ua galulue soosoo tau‘au ma le Iunivesite faafomai a le Oceania lea ua faatū i Samoa.
E toatele alo ma fanau o Samoa aemaise foi i latou mai isi atunuu o le itulagi ua a‘oa‘oina ai i lenei Iunivesite e i totonu lava o le Lotoā a le Maota Gasegase tele i Motootua, ma o lea ua sauni le aoga tele lenei mo le fausia o se falemai faapitoa mo a‘oa‘oga a i latou e iai le manaoga e auauna faafomai.
Ua iai foi ma se tupe e silia ma le 20 miliona tala ua mae‘a nei ona pasia e fausia ai lenei nofoaga tele mo le a‘oa‘oina ai o le tomai faafomai, ae ua faaauau ona faatino a‘oa‘oga e ala lea i le aumai i Samoa o i latou e iai tomai faapitoa nei e pei o fomai tipitipi mo le fesoasoani ai i a‘oa‘oga a i latou o loo i le Iunivesite.
Ua iai foi fesootaiga tau Internet ma isi fomai ua faiaoga ai i le Iunivesite lenei. O le tele o fanau mai i le Iunivesite Aoao o Samoa sa iai le avanoa e a‘oa‘oina ai i Aoga faafomai i isi atunuu o le Pasefika, ua o latou faaaogā nei ia avanoa e nonofo ai i Samoa ma a‘oa‘oina ai i le tomai lava lenei faafomai.
O le vaiaso lenei e toe taliu atu ai i Niu Sila i latou na feagai ma le faatinoga o nei a‘oa‘oga i Samoa nei.
