O le tali atu a le auaunaga a le Pacific Business Hub i o tatou tagata faipisinisi faapea nisi o pisinisi mai nisi atumotu o le Pasifika i le faaiuga o le vaiaso ua mavae na maua ai le avanoa e faalauiloa ai le tele o oloa a nei pisinisi mai Samoa ma isi atunuu o le Pasefika i totonu o Aukilani ina ua lē mafai ona tau lau o le faamoemoe o le Pasifika Festival na mafua ai ona malaga mai i lenei tausaga.
E fa pisinisi mai Samoa na malaga mai i lenei tausaga lea ua mafai ona fesoasoani iai le Pacific Business Hub, e aofia ai le Rimani Samoa, Insider Samoa, Nelly Samoa ma le Tulela Boutique, faatasi ai ma le pisnisi mai Tahiti faapea le pisinisi mai Ausetalia. O le lagona maualuga i le faletua ia Laura Keil Hall o le fia fesoasoani lea ma soosoo tau’au atu lea i pisinisi mai Samoa ina ia maualuga le atina’eina o pisinisi ma auaunaga a o tatou tagata mai le Pasefika. Ina ua latou iloa foi ua lē faataunuuina le Pasifika Festival ma o lea sa naunau ai loa e fai se isi galuega fesoasoani mo tatou tagata ina ia aua ne’i lusi pe maimau le tele o a latou tupe sa faaalu i pasese ma le totogiina o a latou uta lea sa aumai i le vaalele.
O le Aso Toonai na faatumulia ai le auaunaga poo le ofisa lenei a le Pacific Business Hub i Manukau i le mamalu o le atunuu lea sa mafai ona agai atu e maimoaina le tele o oloa a o tatou tagata lea sa aumai i Samoa i le vaiaso ua mavae. Ua felanulanuai vaaaiga eseese i le matagofie o laei ua lolomiina ai le tele o mamanu eseese e pei ona faalauiloa ma faatauina i le faaiuga o le vaiaso. Ua lē gata i laei ae ua faatauina ai foi le siamupopo na gaosia mai lava i Samoa, faapea nisi o oloa mai Tahiti, o oloa o loo gaosia i Tonga ae o loo mafai ona faatinoina e se tasi o pisinisi i Niu Sila nei, aemaise ai o nisi o oloa eseese o loo gaosia lava e tatou tagata Samoa o loo nonofo foi i lenei atunuu. O se avanoa faaauro ua mafai ai ona fai le filifiliga saoloto a le tagata faatau i le tāua ma le matagofie o taleni o loo foai e le Atua i o tatou tagata ua maua ai tupe e atia’e ai o latou aiga.
E tolu aso sa faatinoina ai lea galuega fesoasoani a le Pacific Business Hub mo pisinisi mai le Pasifika e pei ona amataina i le Aso Toonai ua mavae, o le Aso Sa ma le Aso Gafua. Ae pei ona faaalia e nisi o pisinisi mai Samoa o loo auai i lenei polokalame i aso e tolu e momoli le latou faafetai tele i le faletua ia Laura Keil Hall ma le auaunaga a le Pacific Business Hub ona o lenei galuega alofa ua mafai ai ona faaaogāina lo latou taimi na malaga mamao mai ai i Samoa, ma o se avanoa lelei ua silasila ai nisi o le atunuu ia latou oloa ma faatauina a latou pisinisi. E ui e lē o se nofoaga tele, ae sa latou vaaia lava le toatele atu o le mamalu o le atunuu e faatau ma maimoa i le tele o le atina’e la ua iai Samoa e ala i pisinisi a aiga ma tagata taitoatasi.
O le auaunaga lava latou a le Pacific Business Hub, o le taumafai lea e foai atu pe ofo atu i o tatou tagata faipisinisi ni ofisa i se tau taugofie e fuafua i le latou paketi o loo iai, ina ia mafai ona atia’e ai pea le latou auaunaga i le atunuu. E mafai foi ona latou galulue faufautua i le aufapisinisi i le atina’eina o a latou pisinisi faatasi ai ma le latou lagolagosua ia latou galuega.
O le faamoemoe maualuga i le Pacific Business Hub ia mafai ona ausia e le aufaipisinisi Pasefika se tulaga maualuga o a latou auaunaga ma o le ala foi lea o le taumafai e faatino nisi o galuega fesoasoani mo tatou tagata faipisinisi o loo malaga mai ina ia mauaa ai pea o latou loto e faaauau a latou galuega faatino.
